ऑनलाइन लोकमत
मुंबई, दि. २८ - विराटच्या फलंदाजीचे वर्णन करायला अदभुत, असामान्य हे शब्द अपुरे आहेत. त्याची फलंदाजी या शब्दांपलीकडे आहे अशा शब्दात भारताचे महान फलंदाज सुनील गावस्कर यांनी विराटचे कौतुक केले आहे. आजच्या घडीला विराट जगातील सर्वोत्तम फलंदाज असल्याचे त्यांनी सांगितले.
ऑस्ट्रेलियन गोलंदाजांवर तुफानी हल्ला चढवून भारताला दिमाखात उपांत्यफेरीत पोहोचवणा-या विराट कोहलीवर चहूबाजूंनी अभिनंदनाचा वर्षाव होत आहे. आजच्या घडीला मर्यादीत षटकांच्या क्रिकेटमधील तो जगातील सर्वोत्तम फलंदाज आहे. याबद्दल माझ्या मनात अजिबात शंका नाही. त्याची फलंदाजी थक्क करुन सोडणारी आहे असे गावस्कर एनडीटीव्ही वृत्तवाहिनीवर बोलताना म्हणाले.
कोहली दबावाखाली सर्वोत्तम खेळ करतो आणि संघ हिताला प्रथम प्राधान्य देतो हा त्याचा विशेष गुण आहे. संघाला धावांची गरज असताना किंवा धावांचा पाठलाग करताना तुम्ही कोहलीचा रेकॉर्ड बघा. त्याने प्रत्येकवेळी सामना जिंकून दिला आहे. तो निस्वार्थीपणे खेळतो.
जेव्हा तुम्ही अशी मोठी इनिंग खेळता तेव्हा विजयी फटका मारण्याची तुमची इच्छा असते. पण कोहलीने स्ट्राईक धोनीकडे दिले. तो पूर्णपणे संघासाठी खेळतो अशी स्तुतीसुमने गावस्कर यांनी कोहलीवर उधळली.