ऑनलाइन लोकमत
मुंबई, दि. 7 - सचिन तेंडुलकरचा आयपीएलमधला एक विक्रम विराट कोहली यंदाच्या आयपीएलमध्ये मोडण्याची चांगलीच शक्यता आहे. विराट कोहलीला यंदाच्या आयपीएलमध्ये 500 धावा पूर्ण करण्यासाठी अवघ्या 67 धावांची गरज आहे. त्या पूर्ण केल्यास हा टप्पा आयपीएलच्या तीन मोसमात करणारा तो पहिला कप्तान ठरमार आहे. सचिनने हा विक्रम मुंबई इंडियन्ससाठी दोन आयपीएलमध्ये केला होता.
विराट कोहलीच्या रॉयल चॅलेन्जर्स बँगलोरचे पाच साखळी सामने अद्याप बाकी आहेत, त्यानंतर प्लेऑफचे सामने आहेत. त्यामुळे विराट या आयपीएलमध्ये आरामात 500 धावांचा पल्ला पार करेल आणि सचिनचा विक्रम मागे टाकेल अशी शक्यता आहे. या आयपीएलमध्ये सगळ्यात जास्त धावा कोहलीच्या नावे असून तो ऑरेंज कॅपधारक आहे.
सचिनने 2010मध्ये 618 व 2011मध्ये 553 दावा केल्या होत्या. तर कोहलीने 2013मध्ये 634 व 2015मध्ये 505 धावा केल्या होत्या.
आयपीएलमध्ये कप्तानानं सगळ्यात जास्त धावा करण्याचा विक्रम 634 धावांसह कोहलीच्याच नावावर आहे. आता यंदा तो कदाचित नवा विक्रम प्रस्थापित करेल. याखेरीज गौतम गंभीर व डेविड वॉर्नर या अन्य दोन कप्तानांनी 500 चा टप्पा पार केला आहे.