साचलेल्या पाण्यात बुडून दोघांचा मृत्यू

घोटसई ग्रामपंचायत हद्दीतील खिंडीतील दर्ग्याजवळच्या खड्ड्यात पावसाचे पाणी साचले आहे. या पाण्यात अंघोळीसाठी गेलेल्या टिटवाळा येथील

टिटवाळा : घोटसई ग्रामपंचायत हद्दीतील खिंडीतील दर्ग्याजवळच्या खड्ड्यात पावसाचे पाणी साचले आहे. या पाण्यात अंघोळीसाठी गेलेल्या टिटवाळा येथील महागणपती हॉस्पिटल परिसरातील सलमान इक्बाल सय्य्द (२४) व शानू अजित नुरानी (२२) या दोन तरु णांचा बुडून मृत्यू झाला आहे. या घटनेमुळे परिसरातून हळहळ व्यक्त करण्यात येत आहे. नुकतेच मीरा रोड व मुंब्रा येथून टिटवाळा येथील महागणपती हॉस्पिटल परिसरात आपल्या परिवारासह सलमान व शानू हे दोघे राहण्याकरिता आले होते. इंदिरानगर येथील स्मशानभूमीजवळून घोटसई गावाकडे खिंडीतून रस्ता जातो. याच रस्त्यावर एक दर्गा आहे. या दर्ग्यात सलमान व शानू दोघे दुपारी ४ च्या सुमारास गेले होते. याच ठिकाणी असलेल्या खड्ड्यात पावसाचे पाणी साचून तलाव तयार झाला आहे. यात सलमान व शानू अंघोळीसाठी उतरले. परंतु, पाणी खूपच खोल असल्याने व त्यांना पोहता येत नसल्याने दोघांचा बुडून मृत्यू झाला आहे. टिटवाळा पोलीस व कडोंमपाच्या अग्निशमन दलाच्या जवानांनी चार तासांच्या अथक प्रयत्नानंतर दोन्ही मृतदेह पाण्यातून बाहेर काढले. दरम्यान, मृतदेह शवविच्छेदनाकरिता कल्याण येथील रुक्मिणीबाई शासकीय रुग्णालयात पाठविण्यात आले आहेत.