तामिळनाडूचा तिढा सुटला; 'टीव्हीके'ने जुळवले बहुमताचे समीकरण, विजय होणार नवे मुख्यमंत्री 

व्हीसीके आणि आययूएमएलने प्रत्येकी दोन आमदारांसह पाठिंबा जाहीर केल्यानंतर विजय यांनी राज्यपाल राजेंद्र आर्लेकर यांची भेट घेतली.

चेन्नई : तामिळनाडूमध्ये सरकार स्थापनेबाबत गेले चार-पाच दिवस सुरू असलेली अनिश्चितता अखेर शनिवारी संपली. टीव्हीकेचे प्रमुख सी जोसेफ विजय रविवारी राज्याचे नववे मुख्यमंत्री म्हणून शपथ घेतील. नवीन सरकारचा शपथविधी सोहळा चेन्नई येथील जवाहरलाल नेहरू इनडोअर स्टेडियममध्ये सकाळी १० वाजता पार पडेल.

शनिवारी व्हीसीके आणि आययूएमएलने प्रत्येकी दोन आमदारांसह पाठिंबा जाहीर केल्यानंतर विजय यांनी राज्यपाल राजेंद्र आर्लेकर यांची भेट घेऊन १२० आमदारांची पाठिंब्याची पत्रे सादर केली. त्यानंतर विजय यांना सत्तास्थापनेचे निमंत्रण राज्यपालांनी दिले. तसेच १३ मे किंवा त्यापूर्वी विधानसभेत विश्वासदर्शक ठराव संमत करण्यास सांगितले आहे.

१२० आमदारांचे समर्थन

तामिळगा वेत्री कळघम -१०७*
काँग्रेस -५
व्हीसीके -२
भारतीय कम्युनिस्ट पक्ष -२
मार्क्सवादी कम्युनिस्ट पक्ष -२
आययूएमएल -२
एकूण संख्या (बहुमत) - १२०

*विजय यांच्या २ पैकी १ जागा रिक्त.