अंघोळीसाठी गेली, पण परत आलीच नाही! तासभर वाट पाहून पतीने दरवाजा तोडला, आत भीषण दृश्य...

अंघोळीसाठी गेलेली एक ३५ वर्षीय महिला तब्बल एक तास बाहेर न आल्याने पतीने दरवाजा तोडला असता, ती बेशुद्धावस्थेत आढळली.

थंडीत गरम पाण्याने आंघोळ करणे आरामदायक असले तरी, निष्काळजीपणाने वापरलेला गॅस गीझर किती जीवघेणा ठरू शकतो, याची धक्कादायक घटना उत्तर प्रदेशातील मुजफ्फरनगर येथे उघडकीस आली आहे. अंघोळीसाठी गेलेली एक ३५ वर्षीय महिला तब्बल एक तास बाहेर न आल्याने पतीने दरवाजा तोडला असता, ती बेशुद्धावस्थेत आढळली. गीझरमधून बाहेर पडलेल्या विषारी वायूमुळे श्वास गुदमरून तिचा दुर्दैवी मृत्यू झाला असून, या घटनेने कुटुंबावर शोककळा पसरली आहे.

गीझरचा वापर करताना योग्य ती खबरदारी न घेतल्यास होणारे गंभीर परिणाम या घटनेमुळे पुन्हा एकदा अधोरेखित झाले आहेत. मुजफ्फरनगर येथे कॉस्मेटिक व्यापारी असलेले गौरव बंसल यांची पत्नी वर्षा बंसल (वय ३५) यांच्यासोबत ही दुर्दैवी घटना घडली. शुक्रवारी सकाळी ८ वाजता वर्षा अंघोळ करण्यासाठी बाथरूममध्ये गेली होती. त्यावेळी गौरव हे बाहेर मॉर्निंग वॉकसाठी गेले होते, तर त्यांची आई आणि तीन मुले घरी झोपलेली होती.

दरवाजा तोडला, पण खूप उशीर झाला होता!

गौरव सुमारे एक तासानंतर घरी परतले. त्यावेळी त्यांनी पाहिले की, वर्षा अजूनही बाथरूममधून बाहेर आली नव्हती. बराच वेळ झाल्याने त्यांना चिंता वाटू लागली. त्यांनी दरवाजा ठोठावला आणि वर्षाला आवाज दिला, पण आतून कसलाही प्रतिसाद आला नाही. काहीतरी अघटित घडल्याची शंका आल्याने गौरव घाबरले आणि त्यांनी तातडीने बाथरूमचा दरवाजा तोडला. आतमध्ये पाहताच त्यांच्या पायाखालची जमीन सरकली. वर्षा बेसुद्धावस्थेत जमिनीवर पडलेली होती.

विषारी वायू ठरला मृत्यूचे कारण

गॅस गीझर सतत चालू असल्याने, त्यातून बाहेर पडलेल्या विषारी वायूमुळे वर्षा यांचा श्वास गुदमरला आणि त्यांचा जागेवरच मृत्यू झाला होता. गौरव यांनी तातडीने त्यांना रुग्णालयात नेले, पण डॉक्टरांनी तपासणी करून वर्षा यांना मृत घोषित केले.

डॉक्टरांनी दिलेल्या माहितीनुसार, गॅस गीझरमधून कार्बन मोनोऑक्साइड आणि कार्बन डायऑक्साइड हे वायू बाहेर पडतात. जिल्हा रुग्णालयाचे ज्येष्ठ फिजिशियन डॉ. योगेंद्र त्रिखा यांनी सांगितले की, जर बाथरूममध्ये हवा खेळती राहण्याची योग्य व्यवस्था नसेल, तर हे वायू श्वासातून शरीरात जाऊन गुदमरल्याने मृत्यू ओढवतो.

गौरव आणि वर्षा यांना १५ वर्षांचा राघव, १२ वर्षांचा अथर्व आणि ७ वर्षांचा वंश असे तीन मुले आहेत. आईच्या अचानक जाण्याने या तिन्ही मुलांवर दुःखाचा डोंगर कोसळला असून, संपूर्ण कुटुंबावर आघात झाला आहे.