केजरीवाल आणखी १४ दिवस तुरुंगातच

भाजप नेते नितीन गडकरी यांची बदनामी केल्याप्रकरणी अरविंद केजरीवाल यांनी शुक्रवारी जातमुचलक्याची रक्कम भरण्यास नकार दिल्याने दिल्ली कोर्टाने त्यांना आणखी १४ दिवसांची न्यायालयीन कोठडी सुनावली आहे.

ऑनलाइन टीम

नवी दिल्ली, दि. २३ - भाजप नेते नितीन गडकरी यांची बदनामी केल्याप्रकरणी अरविंद केजरीवाल यांनी शुक्रवारी जातमुचलक्याची रक्कम भरण्यास नकार दिल्याने दिल्ली कोर्टाने त्यांना आणखी १४ दिवसांची न्यायालयीन कोठडी सुनावली आहे. आता केजरीवाल यांना ६ जूनपर्यंत तिहार तुरुंगात काढावी लागणार आहेत. 

नितीन गडकरींची बदनामी केल्याप्रकरणी शुक्रवारी दिल्ली न्यायालयात सुनावणी झाली. या सुनावणीसाठी केजरीवाल यांना कोर्टासमोर हजर करण्यात आले. शुक्रवारीही केजरीवाल यांनी १० हजार रुपयांच्या जातमुचलक्यावर जामीन मंजूर केला. मात्र केजरीवाल यांनी पुन्हा एकदा ही रक्कम भरण्यास नकार देत जामीन नाकारला. अखेरीस कोर्टाने केजरीवाल यांना १४ दिवसांसाठी न्यायालयीन कोठडीत ठेवण्याचे आदेश दिले. दरम्यान, आपचे नेते सोमनाथ भारती यांनी केंद्रात भाजपची सत्ता आल्यानेच केजरीवाल यांना तब्बल १४ दिवसांसाठी कोठडीत ठेवण्यात आले आहे. हा प्रकार म्हणजे मूलभूत हक्कांची गळचेपी असल्याचे भारती यांनी सांगितले. चोराला चोर म्हणून आम्ही काहीही चूक केली नाही असे सोमनाथ भारतींनी सांगितले. 

काय आहे प्रकरण?

गत जानेवारी महिन्यात केजरीवाल यांनी देशातील सर्वाधिक भ्रष्ट लोकांची यादी जाहीर केली होती. या यादीत भाजपा नेते गडकरी यांचे नाव होते. याविरुद्ध गडकरींनी केजरीवाल यांच्याविरोधात दिल्ली न्यायालयात फौजदारी याचिका दाखल केली होती. केजरीवालांच्या आरोपांमुळे आपली प्रतिमा मलिन झाल्याचा दावा गडकरींनी यात केला होता.