थलपती विजय कसे गाठणार बहुमताचा 'मॅजिक फिगर'? नवा पेच : काँग्रेस येणार का सोबत? अल्पमताचे सरकार स्थापन होणार?

विजय यांच्या पक्षाने १०८ जागा जिंकल्या आहेत. (विजय यांनी पेरांबूर आणि तिरुची पूर्व अशा दोन जागांवरून विजय मिळवला आहे, त्यामुळे त्यांना एक जागा सोडावी लागेल.

चेन्नई : तामिळनाडू विधानसभा निवडणुकीत अभिनेता विजय यांच्या तमिळगा वेत्री कळघम अर्थात टीव्हीके पक्षाने सर्वाधिक जागा जिंकल्या आहेत. मात्र, कोणत्याही एका पक्षाला स्पष्ट बहुमत न मिळाल्याने राज्यात 'त्रिशंकू' स्थिती निर्माण झाली आहे. हा 'त्रिशंकू' चक्रव्यूह भेदून विजय यांना सत्ता स्थापन करावी लागणार असून, त्यासाठी त्यांनी काँग्रसकडे पाठिंबा मागितला आहे.

पश्चिम बंगालमध्ये मोठा राडा! भाजपने मध्यरात्री हॉग मार्केटमधील तृणमूल काँग्रेसचे कार्यालय पाडले, बुलडोझर आणला अन्...

विजय यांच्या पक्षाने १०८ जागा जिंकल्या आहेत. (विजय यांनी पेरांबूर आणि तिरुची पूर्व अशा दोन जागांवरून विजय मिळवला आहे, त्यामुळे त्यांना एक जागा सोडावी लागेल. परिणामी टीव्हीकेचे संख्याबळ १०७ होईल. तामिळनाडू विधानसभेच्या एकूण २३४ जागांपैकी सरकार स्थापनेसाठी ११८ जागांचे बहुमत आवश्यक आहे. सरकार स्थापनेसाठी विजय यांना अजून ११ आमदारांच्या पाठिंब्याची गरज आहे. के.सी. वेणुगोपाल यांनी सांगितले की, विजय यांनी सरकार स्थापनेसाठी काँग्रेसकडे पाठिंब्यासाठी संपर्क साधला आहे. राजकीय वाटाघाटी पूर्ण झाल्यानंतर १० मे २०२६ च्या सुमारास नवीन मुख्यमंत्री आणि मंत्रिमंडळाचा शपथविधी होण्याची शक्यता आहे.

अध्यक्षांची निवड महत्त्वाची

बहुमत सिद्ध करताना विधानसभेच्या अध्यक्षांची निवड महत्त्वाची ठरेल. अध्यक्षांना मतदानाचा अधिकार नसल्याने, तांत्रिकदृष्ट्या टीव्हीकेला स्वतःचे स्थान सुरक्षित ठेवण्यासाठी किमान १२ अतिरिक्त आमदारांच्या समर्थनाची गरज भासेल.

काय सांगतात आकडे?

पक्ष           जिंकलेल्या जागा

टीव्हीके         १०८

द्रमुक          ५९

अण्णाद्रमुक             ४७

काँग्रेस         ५

पीएमके        ४

मुस्लिम लीग           २

सीपीआय              २

व्हिसीके        २

सीपीआयएम            २

भाजप         १

डीएमडीके              १

अम्मा मक्कल          १

एकूण          २३४

काय आहेत शक्यता?

टीव्हीकेला बहुमताचा आकडा गाठण्यासाठी द्रमुक आघाडीतील लहान पक्षांच्या पाठिंब्याची गरज पडू शकते. यामध्ये काँग्रेस (५ जागा), व्हीसीके (२), सीपीआय (२) आणि सीपीआयएम (२) या पक्षांचा समावेश आहे. या सर्वांनी पाठिंबा दिल्यास टीव्हीकेचा आकडा नेमका ११८ वर पोहोचू शकतो.

जर एखादा पक्ष थेट सत्तेत सामील होण्यास तयार नसेल, तर टीव्हीके त्यांना मंत्रिमंडळात न घेता केवळ विश्वासदर्शक ठरावावेळी 'बाहेरून पाठिंबा' देण्याची विनंती करू शकते.

काँग्रेसची भूमिका काय?

विजय यांनी आधी काँग्रेस नेतृत्वाशी संपर्क साधला आहे. काँग्रेसने अद्याप अधिकृत निर्णय घेतलेला नाही, परंतु 'भाजपला सत्तेपासून दूर ठेवण्यासाठी' ते धर्मनिरपेक्ष सरकारला पाठिंबा देण्याचे संकेत देत आहेत.