हॅलो २...देवलापूरकरांकडून समाजाला शहाणपण देण्याचे काम : पानसरे दीपक देवलापूरकर यांचा गौरव

कोल्हापूर : आज समाजात चांगले काहीच घडत नाही, असा प्रचार सुरू आहे. चुकीच्या घटना समाजात पटकन पसरतात पण चांगल्या कार्याच्या अत्तराचा फाया नाकाजवळ धरावा लागतो, त्याचवेळी समाजाला बिघडवणार्‍या व्यवस्थेची टक्कर द्यावी लागते. दीपक देवलापूरकर यांनी अशाचप्रकारे समाजाला शहाणपण देण्याचे काम केले आहे, असे मत ज्येष्ठ नेते गोविंद पानसरे यांनी व्यक्त केले.
शाहू स्मारक भवनच्या मिनी हॉलमध्ये सेवानिवृत्तीनिमित्त दीपक देवलापूरकर गौरव समितीच्यावतीने त्यांचा गौरव करण्यात आला. यावेळी ते प्रमुख पाहुणे म्हणून बोलत होते. अध्यक्षस्थानी सामाजिक कार्यकर्ते सुरेश शिपूरकर होते. यावेळी जिल्हा परिषदेच्या कुष्ठरोग विभागाच्या साहायक संचालिका हर्षला वेदक, निवृत्त कर्नल प्रकाश मिठारी उपस्थित होते.
पानसरे म्हणाले, सरकारी अधिकार्‍यांबद्दल चांगले बोलण्याचे प्रसंग फार कमी येतात. पण चांगल्या अधिकार्‍यांबद्दल समाज मनात टोकाचे प्रेम असते. अधिकारी हे लोकशाहीचा आधारस्तंभ असतात तर लोकप्रतिनिधी आणि सरकारी अधिकार्‍यांना सरळ करण्याचे काम कार्यकर्त्यांचे असते. देवलापूरकर यांनी एक अधिकारी आणि कार्यकर्ता म्हणून समाजाला शहाणपण देण्याचे काम केले आहे.
सत्कारानंतर देवलापूरकर म्हणाले, आम्ही शून्यातून समाजकार्याचे पर्यावरण रक्षणाचे हे काम निर्माण केले. सरकारी अधिकारी असतानाही कधी रुपयाची लाच घेतली नाही, कुणाला दिली नाही. व्यसनमुक्ती, पर्यावरण रक्षणासाठी प्रत्येकवेळी शासनालाच दोष देऊन चालणार नाही तर आपणही आपली जबाबदारी स्वीकारली पाहिजे. त्यासाठी दबावगट निर्माण केला पाहिजे. अलका देवलापूरकर यांनीही यावेळी मनोगत व्यक्त केले.
हर्षला वेदक म्हणाल्या, कुष्ठरोग्यांचा सन्मान आणि जगण्याचे बळ देण्याचे काम देवलापूरकर यांनी केले आहे. त्यांच्या या कार्यात आपण काही खारीचा वाटा उचलू शकतो का याचा विचार सर्वांनी केला पाहिजे.
सुरेश शिपूरकर म्हणाले, देवलापूरकर आणि माझी पहिली भेट १९८२ मध्ये झाली. त्यावेळी कुष्ठरोग्यांना डॉक्टरांकडून मिळणार्‍या वाईट वागणुकीबद्दल मला सांगितले आणि आम्ही तेथे पहिले आंदोलन डॉक्टरांविरोधात केले. वंचित घटक, व्यसनमुक्ती आणि पर्यावरण रक्षणासाठी झटणारा हा कार्यकर्ता आहे. यावेळी प्रकाश मिठारी, साधना पाटील, अंकुश वणकुद्रे, बापूसाहेब हेगडे यांनी मनोगत व्यक्त केले. आर. आर. कांबळे यांनी मानपत्राचे वाचन केले. प्रकाश सुतार यांनी सूत्रसंचलन केले. व्ही. बी. चौगले यांनी आभार मानले.
----------
फोटो नं ०९ कोल देवलापूरकर
ओळ :
कोल्हापुरातील शाहू स्मारक भवन येथे शुक्रवारी सामाजिक कार्यकर्ते दीपक देवलापूरकर यांचा ज्येष्ठ नेते गोविंद पानसरे यांच्या हस्ते सत्कार करण्यात आला. यावेळी हर्षला वेदक, अलका देवलापूरकर, सुरेश शिपूरकर, प्रकाश मिठारी उपस्थित होते. (नसीर अत्तार)
---------------------