- ऑनलाइन लोकमत
बरेली, दि. 19 - जमात-उद-दावा दहशतवादी संघटनेचा प्रमुख हाफीज सईदविरोधात फतवा काढण्यात आला आहे. दरगाह आला हजरतने हा फतवा काढला आहे. भारतात झालेल्या अनेक दहशतवादी हल्ल्यांमध्ये त्याचा असलेला सहभाग असून इस्मालिक दहशतवादाला वाढ देण्यात त्याचा महत्वाचा वाटा आहे. तसंच हाफीज सईद मुस्लिम नसल्याचंही फतव्यातून सागंण्यात आलं आहे.
फतव्याच्या माध्यमातून मुस्लिमांना हाफीज सईदची भाषणे न ऐकण्याचं आवाहन करण्यात आलं आहे. 'सईद दहशतवादाची शिकवण देतो. इस्लामच्या नावाखाली दहशतवादाला बढावा देत आहे, ज्यामुळे जगभरातील मुस्लिमांचं नाव खराब होत आहे', असं फतव्यामध्ये सांगण्यात आलं आहे.
जयपूरमधील रहिवासी मोहम्मद मोईनुद्दीन या व्यक्तीने दरगाह आला हजरतला हाफीज सईदसंबंधी आपली बाजू स्पष्ट करण्याचं आवाहन केलं होतं. प्रोफेट मोहम्मदविरोधात बोलणारा तसंच दहशतवादाला खतपाणी घालणा-या अशा व्यक्तीला मुस्लिम म्हणू शकतो का ? असा सवाल त्यांनी विचारला होता. 'हाफीज सईदची विचारसरणी इस्लामच्या उलट आहे. याउलट प्रोफेट मोहम्मदविरोधात बोलणा-यांना तो प्रवृत्त करत आहे. तो मुस्लिम नाही', असं मुफ्ती मोहम्मद सलीन नुरी यांनी सांगितलं आहे.