छ. संभाजीनगरमध्ये IAS बनून फिरणाऱ्या महिलेच्या अफगाणी बॉयफ्रेंडला अटक; कल्पनाच्या मोबाईलमध्ये सापडले पाकिस्तानचे ११ नंबर

आयएएस अधिकारी भासवणाऱ्या महिलेच्या बॉयफ्रेंडला तपास यंत्रणांनी अटक केली आहे.

Delhi Blast: नवी दिल्लीतील लाल किल्ल्याजवळ १० नोव्हेंबर २०२५ रोजी झालेल्या भीषण बॉम्बस्फोटाच्या तपासात रोज नवनवीन आणि धक्कादायक खुलासे होत असताना, या प्रकरणाचे धागेदोरे आता महाराष्ट्रापर्यंत पोहोचले आहेत. छत्रपती संभाजीनगर येथे स्वतःला आयएएस अधिकारी भासवणाऱ्या कल्पना भागवत नावाच्या संशयित महिलेच्या अटकेनंतर, आता तपास यंत्रणांनी तिच्या कथित अफगाणिस्तानी बॉयफ्रेंडलाही दिल्लीतून अटक केली आहे. मोहम्मद अशरफ नावाच्या या आरोपीच्या अटकेमुळे दहशतवादी हल्ल्याच्या आंतरराष्ट्रीय आणि आर्थिक बाजू उघड होण्याची शक्यता आहे.

अफगाणी व्यापारी निघाला संशयित दहशतवादी

छत्रपती संभाजीनगर येथील एका हॉटेलमध्ये बनावट कागदपत्रांच्या आधारे आयएएस अधिकारी म्हणून राहत असलेल्या कल्पना भागवतला काही दिवसांपूर्वी अटक करण्यात आली होती. तिच्या चौकशीतूनच दिल्लीतून अटक करण्यात आलेल्या मोहम्मद अशरफ याचे नाव समोर आले. आरोपी मोहम्मद अशरफ याला दिल्लीतून अटक करण्यात आली आहे. अशरफ हा अफगाणिस्तानचा नागरिक असून तो भारतात व्यापारी म्हणून राहत होता, अशी प्राथमिक माहिती आहे.

तपास यंत्रणांना शंका आहे की, त्याचे आंतरराष्ट्रीय आणि आर्थिक व्यवहार संशयास्पद असू शकतात. त्याच्या अटकेमुळे या संपूर्ण प्रकरणातील फंडिंग ट्रेल आणि परदेशातील मदतीचा स्रोत उघड होण्याची दाट शक्यता आहे.

कल्पनाच्या मोबाईलमध्ये पाकिस्तानचे ११ नंबर

या प्रकरणातील मुख्य संशयित असलेल्या कल्पना भागवत हिची कसून चौकशी गुप्तचर यंत्रणा करत आहे. तिच्या मोबाईल फोनच्या तपासणीत अत्यंत गंभीर माहिती समोर आली आहे. कल्पनाच्या मोबाईलमध्ये पाकिस्तानशी जोडलेले ११ संशयास्पद फोन नंबर सापडले आहेत. प्राथमिक तपासानुसार, ज्या दिवशी (१० नोव्हेंबर) दिल्लीच्या लाल किल्ल्याजवळ बॉम्बस्फोट झाला, त्याच दरम्यान कल्पना भागवत दिल्लीत उपस्थित होती. तिच्याकडून काही संशयास्पद कागदपत्रेही जप्त करण्यात आली आहेत.

तपास आता आंतरराष्ट्रीय संकटाकडे

दिल्ली बॉम्बस्फोटात १० हून अधिक निष्पाप नागरिक ठार झाले होते आणि अनेकजण जखमी झाले होते. सुरुवातीला स्थानिक वाटणाऱ्या या हल्ल्याचे धागेदोरे आता आंतरराष्ट्रीय दहशतवादी संघटनांशी जोडले जात आहेत. सूत्रांनुसार, या हल्ल्यात बांग्लादेशातील अंसरुल्ला बांगला टीम आणि पाकिस्तानस्थित लष्कर-ए-तोयबा  यांसारख्या संघटनांचे कनेक्शन उघड झाले आहेत.

मोहम्मद अशरफच्या अटकेनंतर आता तपास यंत्रणा कल्पना भागवत आणि अशरफ यांच्यातील आर्थिक व्यवहार, त्यांच्यातील संपर्क आणि विशेषतः त्यांच्या विदेशी संपर्कांची अत्यंत कसून चौकशी करणार आहेत. बनावट ओळखपत्र वापरणारी एक महिला आणि अफगाणी नागरिक असलेला तिचा कथित बॉयफ्रेंड यांचे पाकिस्तानशी थेट कनेक्शन सापडणे, हे भारतासाठी एका मोठ्या 'व्हाईट कॉलर टेरर' नेटवर्कचे संकेत देत असून, आगामी काळात या प्रकरणात अनेक खुलासे होण्याची शक्यता आहे.