Shocking: लिफ्टच्या शाफ्टमध्ये पडून वृद्धाचा मृत्यू, दोन दिवसांनंतर आढळला मृतदेह, नेमकं काय घडलं?

Gujarat Valsad Lift Accident: गुजरातच्या वलसाड जिल्ह्यातील एका निवासी सोसायटीमध्ये लिफ्टच्या शाफ्टमध्ये पडून वृद्धाचा मृत्यू झाला.

गुजरातच्या वलसाड जिल्ह्यातील एका निवासी सोसायटीमध्ये लिफ्टचा अत्यंत धक्कादायक अपघात घडला आहे. लिफ्टच्या शाफ्टमध्ये पडल्यामुळे एका वृद्धाचा मृत्यू झाला. लिफ्टच्या शाफ्टमधून दुर्गंधी येऊ लागल्याने हा धक्कादायक प्रकार उघड झाला. तांत्रिक बिघाडामुळे लिफ्टची केबिन मजल्यावर नसतानाही दरवाजा उघडल्याने हा भीषण अपघात घडल्याचे समोर आले. याप्रकरणी अपघाती मृत्युची नोंद करण्यात आली असून पोलिसांनी पुढील चौकशी सुरू केली आहे. या घटनेने परिसरात एकच खळबळ माजली आहे. 

नेमकी घटना काय?

मिळालेल्या माहितीनुसार, ही घटना वलसाडमधील निर्मल सोसायटीमध्ये घडली. माळी म्हणून काम करणारी एक वृद्ध व्यक्ती इमारतीच्या तिसऱ्या मजल्यावर लिफ्टची वाहत पाहत होते. यावेळी तांत्रिक बिघाडामुळे लिफ्टची केबिन त्या मजल्यावर नसतानाही लिफ्टचा दरवाजा उघडला गेला. अंधार असल्याने समोर लिफ्ट आल्याची समजून त्यांनी आत पाऊल टाकले आणि खाली कोसळले. हा अपघात घडला तेव्हा आसपास कोणीही नसल्यामुळे ही बाब कोणाच्याही लक्षात आली नाही. दोन दिवसांनंतर सोसायटीमध्ये प्रचंड दुर्गंधी पसरू लागल्याने रहिवाशांना संशय आला. त्यांनी तपास केला असता लिफ्टच्या खाली शाफ्टमध्ये या वृद्धाचा मृतदेह अत्यंत खराब अवस्थेत आढळून आला.

पोलिसांची कारवाई आणि सीसीटीव्ही फुटेज

या घटनेची माहिती मिळताच पोलिसांनी घटनास्थळी धाव घेत मृतदेह शवविच्छेदनासाठी जवळच्या रुग्णालयात पाठवण्यात आला. पोलिसांनी सोसायटीतील सीसीटीव्ही फुटेज तपासले असता, हा सर्व प्रकार तांत्रिक बिघाडामुळे आणि लिफ्टच्या देखभालीअभावी झाल्याचे स्पष्ट झाले. लिफ्टच्या इंटरलॉक सिस्टीममध्ये बिघाड झाल्याने केबिनशिवाय दरवाजा उघडला गेला. याप्रकरणी वलसाड पोलिसांनी अपघाती मृत्यूची नोंद केली असून, लिफ्टच्या मेंटेनन्ससाठी जबाबदार असलेल्या व्यक्तींची चौकशी सुरू केली.

सुरक्षेचा प्रश्न ऐरणीवर

या घटनेमुळे रहिवासी सोसायट्यांमधील लिफ्टच्या सुरक्षेचा आणि नियमित देखभालीचा प्रश्न पुन्हा एकदा ऐरणीवर आला आहे. लिफ्टची वेळेवर तपासणी न करणे जीवावर बेतू शकते, हेच या दुर्दैवी घटनेतून पुन्हा एकदा स्पष्ट झाले आहे.