गेल्या २४ तासांत भारतात कोविड-१९मुळे पाच जणांचा मृत्यू झाल्याची माहिती आरोग्य आणि कुटुंब कल्याण मंत्रालयाने दिली आहे. सध्या देशभरात कोरोना रुग्णांची संख्या वाढत असून, सक्रिय कोरोना रुग्णांची संख्या ४,०२६ वर पोहोचली आहे. या मृत्यूंची नोंद केरळ, महाराष्ट्र, तामिळनाडू आणि पश्चिम बंगालमधून झाली आहे. मृत्यू झालेल्या रुग्णांमध्ये सगळेच आधीच काही आरोग्य समस्यांनी ग्रस्त होते.
प्रमुख राज्यांतील कोरोना स्थिती
महाराष्ट्र, केरळ, तामिळनाडू, आणि पश्चिम बंगालमध्ये कोरोनाच्या रुग्णांची संख्या वाढली आहे. दिल्लीत ३९३, गुजरातमध्ये ३९७, कर्नाटकमध्ये ३११, केरळमध्ये १४१६, महाराष्ट्रात ४९४, उत्तर प्रदेशात १३८, तामिळनाडूमध्ये २१५ आणि पश्चिम बंगालमध्ये ३७२ सक्रिय रुग्ण आहेत.
केरळ, तामिळनाडू आणि पश्चिम बंगालमध्ये मृत्यू
केरळमध्ये ८० वर्षीय वृद्धाचा कोरोनामुळे मृत्यू झाला आहे. हा व्यक्ती आधीच गंभीर न्यूमोनिया, तीव्र श्वसनाचा त्रास, मधुमेह, उच्च रक्तदाबाने ग्रस्त होता. तामिळनाडूमध्ये टाइप २ मधुमेह आणि पार्किन्सन आजाराने त्रस्त असलेल्या ६९ वर्षीय महिलेचा मृत्यू कोरोनामुळे झाला. पश्चिम बंगालमध्ये ४३ वर्षीय महिलेला तीव्र कोरोनरी सिंड्रोम, सेप्टिक शॉक आणि तीव्र मूत्रपिंडाच्या आजार होते, तिचा कोरोनामुळे मृत्यू झाला.
महाराष्ट्रातील कोरोना परिस्थिती
महाराष्ट्रातील कोल्हापूर आणि सातारा येथील दोन रुग्णांचा कोरोनामुळे मृत्यू झाला आहे. राज्यातील कोरोना बळींची संख्या १०वर पोहोचली आहे. सोमवारी राज्यात ५९ नवीन रुग्णांची नोंद झाली, त्यापैकी २० रुग्ण मुंबईत आढळले. सध्या, राज्यात कोरोना रुग्णांची संख्या ८७३ आहे, त्यात ४८३ रुग्ण एकट्या मुंबईतील आहेत. मुंबईत कोरोनाची संख्या सतत वाढत असून, ३६९ रुग्ण बरे झाले आहेत.
कोरोनाच्या नवीन उपप्रकारांची लक्षणे
कोविड-१९च्या नवीन उप-प्रकाराने, NB.1.8.1, रुग्णांची संख्या वाढवली आहे. इंडियन कौन्सिल ऑफ मेडिकल रिसर्चने (ICMR) या उप-प्रकाराची पुष्टी केली असून, हा ओमिक्रॉन प्रकाराचे एक वेगाने पसरलेले आणि बदलणारे रूप आहे. या विषाणूचे लक्षणे सौम्य असतात. त्यात ताप, खोकला, घसा खवखवणे, थकवा, डोकेदुखी, शरीरदुखी, नाक वाहणे आणि भूक कमी होणे यांचा समावेश आहे. हे लक्षणे हंगामी तापासारखीच आहेत. आरोग्य मंत्रालयाने नागरिकांना सतर्क राहण्याचे आणि लवकर लक्षणे आढळल्यास योग्य उपचार घेण्याचे आवाहन केले आहे.