जिलेटिनसदृश वस्तूच्या स्फोटात दोघे जखमी

मालेगाव तालुक्यातील कजवाडे घटना

 मालेगाव (नाशिक) : तालुक्यातील कजवाडे येथे आज दुपारी ३ वाजेच्या सुमारास झाडाला टांगलेल्या पिशवीला काठीचा धक्का लागल्याने जिलेटिनसदृश वस्तूचा स्फोट झाल्याने दोन मेंढपाळ जखमी झाल्याची घटना घडली आहे.
कजवाडे येथे काही मेंढपाळ मेंढ्या चारत असताना बाभळाच्या झाडाला टांगलेल्या पिशवीला कुतूहल म्हणून चिंतामण नारायण गोयेकर याने काठी लावली. काठीचा स्पर्श होताच स्फोट होऊन त्यात विठ्ठल नामदेव शिंदे (२२) व चिंतामण नारायण गोयेकर (२३) हे दोघे जखमी झाले. त्यांना तत्काळ उपचारासाठी मालेगाव येथील सामान्य रुग्णालयात दाखल करण्यात आले. याबाबत वडनेर खाकुर्डी पोलिसात कळविण्यात आले. जखमींना विठ्ठल शिंदे यांचे काका कृष्णा शिंदे यांनी उपचारार्थ रुग्णालयात दाखल केले.
चिंतामणच्या शेतात मेंढपाळ मेंढ्या चारत असून, शेजारच्या शेतामध्ये उतरलेल्या फासेपारध्यांनी वन्यप्राण्यांच्या शिकारीसाठी बाभळीच्या झाडाला स्फोटकांची पिशवी
टांगली असल्याचे चिंतामण शिंदे यांनी सांगितले. यामुळे परिसरात एकच घबराट पसरली
आहे. (प्रतिनिधी)