छेडखानी प्रकरणी संशयितास अटक

सीबीएसजवळील घटना : संशयित पोलीस कर्मचारी फरार

नाशिक : नृत्याच्या शिकवणीहून घरी परतणाऱ्या मुलीची छेड काढणारा प्रमुख संशयित वाहतूक शाखेचा पोलीस कर्मचारी अनिल जाधव फरार झाला असून, त्याचा साथीदार मनोज चंदनशीव (२०, रा. फुलेनगर, पंचवटी) यास भद्रकाली पोलिसांनी अटक केली आहे़ त्यास न्यायालयात हजर केले असता १ एप्रिलपर्यंत पोलीस कोठडी सुनावण्यात आली आहे़ शनिवारी सायंकाळी सव्वासात वाजेच्या सुमारास शिवाजी रोडवर ही घटना घडली होती़कमोदनगर परिसरात राहणारी ही मुलगी शनिवारी सायंकाळी नृत्याच्या शिकवणीहून कमोदनगरला जाण्यासाठी शिवाजीरोडने सीबीएसकडे जात होती़ तिथे पोलीस कर्मचारी अनिल जाधव याने तिला अडवून छेड काढल्यानंतर तिने त्याच्या मुस्कटात दिली़ यामुळे दुखावलेल्या जाधवने तुझ्यावर गुन्हा दाखल करतो अशी धमकी दिली़ तेव्हा तेथील एका रिक्षाचालकाने तिच्यावर नाही तर तुमच्यावरच गुन्हा दाखल होईल, असे सांगितल्यांनतर जाधव तेथून निघून गेला़ सदर मुलगी रिक्षात बसून कमोदनगरला जात असताना पल्सर दुचाकीवर अनिल जाधव आणि मनोज चंदनशीव यांनी तिचा पाठलाग करून अडविले व मारण्याचा जाब विचारला तसेच तिच्या अंगावर ७०३८५९९३६२ हा मोबाइल नंबर लिहिलेला एक कागद फेकला़ या प्रकारामुळे घाबरलेली मुलगी घरी पोहोचली व तिने पालकांना हा प्रकार सांगितल्यानंतर त्यांनी इंदिरानगर पोलीस ठाणे गाठून विनयभंगाची फिर्याद दिली़ दरम्यान, हा गुन्हा भद्रकाली पोलिसांकडे वर्ग करण्यात आला़ भद्रकाली पोलिसांनी या मोबाइल नंबरवरून राज्य परिवहन महामंडळातील शहापूर बस डेपोमध्ये नोकरीस असलेल्या मनोज चंदनशीव (वय २०, फुलेनगर, पंचवटी) यास अटक केली असून, प्रमुख संशयित पोलीस कर्मचारी अनिल जाधव फरार आहे़ (प्रतिनिधी)