जुना तोफगोळा सापडल्याने खळबळ उडाली़

जुना तोफगोळा सापडल्याने खळबळ उडाली़

नाशिकरोड : देवळाली गाव वालदेवी नदीपुलाखाली नवीन पुलाच्या बांधकामाचे काम सुरू असताना रविवारी दुपारी जुना तोफगोळा सापडल्याने खळबळ उडाली़ या घटनेची माहिती लष्कराला देण्यात आली असून, सोमवारी लष्कराचे पथक पाहणीसाठी येणार आहे़
नाशिकरोडकडून देवळाली कॅम्पकडे जाताना डाव्या बाजूला वालदेवी नदीवर नवीन पुलाचे काम सुरू आहे़ रविवारी दुपारी जेसीबीच्या साहाय्याने उभारलेल्या पिलरची स्वच्छता व गाळ बाजूला करण्याचे काम सुरू होते़ दुपारी साडेतीन ते चार वाजेच्या सुमारास नवीन पुलाच्या पिलरजवळ उत्खननाचे काम सुरू असताना त्याठिकाणी जमिनीत दडलेला ब्रिटिशकालीन तोफगोळा आढळून आला़ त्यामुळे कामगारांची धावपळ उडाली व सर्वजन काम सोडून पळून गेले़ पंधरा दिवसांपूर्वीच रोटेशन पद्धतीने धरणातून सोडलेल्या पाण्याची पातळी दोन दिवसांपासून खालावलेली असल्याने हे काम हाती घेण्यात आले होते़ या घटनेची माहिती नाशिकरोड पोलिसांना समजताच दुय्यम पोलीस निरीक्षक युवराज गायकवाड यांनी कर्मचाऱ्यांसह घटनास्थळी भेट दिली व बॉम्बशोधनाशक पथकाला पाचारण केले़ हा ब्रिटिशकालीन तोफगोळा पुलाखालून उचलून सुरक्षित ठेवण्यात आला असून, याबाबतची माहिती लष्कराला देण्यात आली़ मात्र रविवारची सुटी व सायंकाळ झाल्याने लष्करी विभागाचे पथक सोमवारी पाहणीसाठी येणार असल्याची माहिती पोलिसांनी दिली़ या घटनेची माहिती नागरिकांना समजताच त्यांनी तोफगोळा पाहण्यासाठी गर्दी केली होती़ या तोफगोळ्याजवळ पोलीस बंदोबस्त तैनात करण्यात आला असून, तो जिवंत आहे की वापरलेला हे लष्करी पथकाच्या पाहणीनंतरच स्पष्ट होणार आहे़ (वार्ताहर)