आरोग्य विभाग घोटाळ्याप्रकरणी ४३ लाखांची वसुली ५३ लाखांचा एकूण घोटाळा, कर्मचाऱ्यांना कारणे दाखवा नोटीस,

आरोग्य विभाग घोटाळ्याप्रकरणी ४३ लाखांची वसुली ५३ लाखांचा एकूण घोटाळा, कर्मचाऱ्यांना कारणे दाखवा नोटीस,

 नाशिक : त्र्यंबकेश्वर पंचायत समितीअंतर्गत कार्यरत असलेल्या आरोग्य विभागातील शंभराहून अधिक कर्मचाऱ्यांनी चुकीच्या पद्धतीने घेतलेले प्रोत्साहन भत्ते व वेतनवाढी यामुळे झालेल्या सुमारे ५३ लाखांच्या घोटाळ्यातील ४३ लाखांची वसुली करण्यात आल्याची माहिती मुख्य कार्यकारी अधिकारी सुखदेव बनकर यांनी दिली. विशेष म्हणजे यासंदर्भात सर्वांत आधी वृत्त दै. लोकमतने २५ डिसेंबरच्या अंकात ‘आरोग्य विभागत लाखोंचा घोटाळा’ या मथळ्याखाली प्रसिद्ध केले होते. त्र्यंबकेश्वरच्या गटविकास अधिकाऱ्यांनी याबाबत एक २४ पानी सविस्तर अहवालाच मुख्य कार्यकारी अधिकारी सुखदेव बनकर यांच्याकडे सादर केला होता. त्यात १०९ कर्मचाऱ्यांकडून अशी वसुली प्रस्तावित करण्यात आल्याचे नमूद करण्यात आल्याचे समजते. याबाबत शुक्रवारी (दि.२६) सुखदेव बनकर यांनी सामान्य प्रशासन विभागाचे उपमुख्य कार्यकारी अधिकारी संदीप माळोदे यांच्याकडे याप्रकरणाची चौकशी सोपविली होती. आरोग्य विभागातील वर्ग दोन व वर्ग तीनच्या कर्मचाऱ्यांनी चुकीच्या पद्धतीने आदिवासी भागात काम केल्याचे प्रोत्साहन भत्ते आणि वेतनवाढी घेऊन जिल्हा परिषदेचा व पर्यायाने शासनाच्या निधीचा विर्पयास केला होता. त्यामुळे अशा सुमारे १०९ कर्मचाऱ्यांकडूनही लाखोंची वसुली प्रस्तावित करण्याचा अहवाल त्र्यंबकेश्वर गटविकास अधिकारी प्रमिला जाखलेकर यांनी मुख्य कार्यकारी अधिकारी सुखदेव बनकर यांना दिलेल्या अहवालात नमूद केल्याचे समजते. त्यामुळे या लाखोंच्या घोटाळ्यातील सुमारे ४३ लाखांची वसुली संबंधित कर्मचाऱ्यांकडून करण्यात आल्याची माहिती सुखदेव बनकर यांनी दिली. तसेच अन्य कर्मचाऱ्यांना कारणे दाखवा नोटीस बजावण्यात आल्याचेही त्यांनी सांगितले. या घोटाळ्याच्या मुळाशी गेल्यास घोटाळ्याची व्याप्ती वाढण्याची शक्यता काही कर्मचाऱ्यांनी खासगीत बोलताना व्यक्त केली आहे.(प्रतिनिधी)