पंचायत राज समितीने गुरुवारी दिवसभर जिल्हा परिषदेत सन २०१६-१७ या आर्थिक वर्षाचे लेखापुनरिक्षण संदर्भात उपस्थित मुद्द्यांवर अधिकाऱ्यांची साक्ष नोंदवून घेतल्यानंतर शुक्रवारी (दि. २७) समिती सदस्यांची पाच पथके करण्यात आली. त्यांच्या सोबत संपर्क अधिकारीही नेमण्यात आले. त्यानुसार प्रत्येक पथकाने तीन तालुक्यांची पाहणी केली. स्वत: समिती अध्यक्ष डॉ. संजय रायमुलकर यांनी निफाड, सिन्नर या तालुक्यांना भेटी देऊन कामकाजाची पाहणी केली तर अन्य सदस्यांनी ग्रामीण भागातील अंगणवाडी, आरोग्य केंद्रे, उपकेंद्रे, शाळा, ग्रामपंचायती, पाणीपुरवठा योजना, पशुवैद्यकीय दवाखान्यांना भेटी देऊन तेथील कामकाजाच्या पद्धती समजावून घेतल्या; तसेच कुपोषण मुक्तीसाठी केल्या जात असलेल्या प्रयत्नांची प्रत्यक्ष खात्री केली. शनिवारी (दि. २८) समितीच्या कामकाजाचा अखेरचा दिवस असून, सन २०१७-१८ या वर्षाच्या जिल्हा परिषदेच्या वार्षिक अहवालाच्या कार्यपूर्ततेचा आढावा समिती घेणार आहे.
चौकट===
विल्होळीत कामांची पाहणी
शुक्रवारी (दि. २७) पंचायत राज समितीने विल्होळी ग्रामपंचायत, जिल्हा परिषद शाळा, प्राथमिक आरोग्य उपकेंद्र, अंगणवाडी यांना भेट देऊन विकासकामांचा आढावा घेत शासकीय उपक्रमांची माहिती घेतली. समितीचे सदस्य आमदार सुभाष घोटे, आमदार अमरनाथ राजूरकर, आमदार माधवराव जळगावकर, आमदार किशोर दराडे, आमदार कैलास पाटील, विधिमंडळ अधिकारी शशिकांत साखरकर यांनी विल्होळी ग्रामपंचायतीतील विकासकामांचा आढावा घेतला. तसेच व्यक्तीस लाभ कसा दिला जातो, याची माहिती घेतली. तसेच जिल्हा परिषद शाळेचा संगणक कक्ष, प्रयोगशाळा, कार्यालयास भेट देऊन शाळेतील नवनवीन उपक्रमांविषयी माहिती घेतली. त्यामध्ये ओट्यावरची शाळा, घरी जाऊन घेतलेली शाळा, ऑनलाइन शिक्षण - झूम, गुगलद्वारे, विषयमित्र, गल्लीमित्र, डोनेट व डिवाइस, स्वाध्याय उपक्रम, शिष्यवृत्ती, ऑनलाइन पालक सभा, ऑनलाइन सेतू अभ्यासक्रम याबाबतची सर्व माहिती मुख्याध्यापक प्रशांत शेवाळे यांनी समितीस दिली. प्राथमिक उपकेंद्रात औषधांचा साठा, साथीच्या रोगावरील नियोजन, डेंग्यू, मलेरिया, चिकनगुनिया या रोगांवरील प्रतिबंधक लसींबाबत आढावा घेऊन त्याबाबत सविस्तर माहिती आरोग्य अधिकारी डॉ. प्रदीप जायभावे यांनी दिली. अंगणवाडीला भेट देऊन पोषण आहार, पोषण आहार वाटप, कुपोषित बालके, बालकांची संख्या याबाबतची माहिती घेतली. या वेळी प्रकल्प अधिकारी उज्ज्वला बावके, गट विकास अधिकारी सारिका बारी, शिक्षणाधिकारी राजीव म्हसकर, विस्ताराधिकारी भाऊसाहेब ठाकरे, उपअभियंता एन.आर. पाटील, जगन्नाथ सोनवणे, श्रीधर सानप, नीलेश पाटोळे, गोरख शेवाळे, गौतम अग्निहोत्री, प्रकाशदास वैष्णव, सरपंच जानकाबाई चव्हाण, उपसरपंच भास्कर थोरात, बळीराम पगार, मोहन रणदिवे, डॉ. प्रदीप जायभावे, डॉ. गौरव भोई, प्रशांत शेवाळे, सोनाली पगार, दिगंबर गोसावी आदी उपस्थित होते.
(फाेटो २७ विल्होळी)