महालक्ष्मी चाळीमध्ये सोमवारी मध्यरात्रीच्या सुमारास झालेल्या सशस्त्र दंगलीत एक जण ठार व दोन युवक गंभीरपणे जखमी झाले आहेत. या दोन्ही गटांमधील सहभागी काही संशयितांविरुद्ध भद्रकालीसह अन्य पोलीस ठाण्यांमध्ये वेगवेगळ्या स्वरुपाचे गंभीर गुन्हे दाखल आहेत. दंगलीचा मुख्य सूत्रधार तसेच खुनातील संशयित तडीपार गुंड विशाल बेनवाल याच्याविरुद्ध शरीराविरुध्द व मालमत्तेविरुध्द गुन्हे दाखल असून, त्यास पोलीस उपआयुक्तांकडून नाशिक शहर व जिल्ह्यातून तडीपार करण्यात आले होते; मात्र तरीही तो जुने नाशिक भागात वावरत होता. खुनाची घटना घडल्यानंतर विशाल हा त्याचा साथीदार अभयसोबत शहरातून फरार झाला. त्याच्या मागावर असलेल्या भद्रकाली गुन्हे शोध पथकाने मुंबईतील माटुंगामधून त्याच्या मुसक्या बांधल्या. तसेच अभय बेनवाल यालाही पोलिसांनी अटक केली आहे. दंगलप्रकरणी भद्रकाली पोलिसांनी आतापर्यंत आठ संशयित गुन्हेगारांना अटक केली असून, केवळ एक संशयित फरार आहे. त्यालाही लवकरच अटक करण्यात येणार असल्याचे वरिष्ठ पोलीस निरीक्षक साजन सोनवणे यांनी सांगितले.
----