दवाखन्यात निघालेल्या वृध्देला भामट्यांनी लुटले

सिन्नर :वृध्देने अनोळखी युवकांच्या दुचाकीची लिफ्ट घेतली. मात्र त्यावर असलेल्या भामट्यांनी सोन्याची दागिने लुटून नेण्याची घटना घडली.

 सिन्नर : दातांची तपासणी करण्यासाठी सिन्नरला निघालेल्या सत्तर वर्षीय वृध्देने गाडी मिळत नसल्याने अनोळखी युवकांच्या दुचाकीची लिफ्ट घेतली. मात्र त्यावर असलेल्या दोघा भामट्यांनी डाव साधत महिलेला मारहाण करीत तीच्या कान व गळ्यात सोन्याची दागिने लुटून नेण्याची घटना दापूर शिवारात सकाळी साडेअकरा वाजेच्या सुमारास घडली.त्याचे झाले असे, दापूर शिवारात राहणारी जनाबाई निवृत्ती आव्हाड (७०) ही वृध्दा सिन्नर येथे दवाखन्यात दातांची तपासणी करण्यासाठी निघाली होती. सकाळी साडेअकरा वाजेच्या सुमारास सदर वृध्दा तेलमाथ्यावर उभी होती. सिन्नरला जाण्यासाठी वाहन मिळत नसल्याने सदर वृध्देने सिन्नरकडे जाणाऱ्या दुचाकीला हात करुन उभे केले. त्यावर असलेल्या दोघा युवकांना आजीला लिफ्ट देण्याचा बहाणा केला. या भामट्यांनी दुचाकी गोंदे फाट्याकडे न वळवता पाटोळे रस्त्याने कात्रीचा ओहाळाकडे निर्जन ठिकाणी नेली. सदर वृध्देला या दोघांनी चाकूसारख्या शस्त्राचा धाक दाखवून दागिणे देण्याची मागणी केली. वृध्देला मारहाण करीत तीच्या गळ्याती सोन्याची पोत, मणीमंगळसूत्र व कानातले सोन्याचे दागिणे ओरबडून घेतले. कानातील दागिने ओरबडतांना वृध्देच्या कानाला जखमी झाली. सुमारे दीड तोळे सोन्याचे दागिने चोरट्यांनी लुटल्यानंतर ते पसार झाले. मारहाण झालेल्या वृध्देने कसेबसे रस्त्यावर येवून एका जीपला हात घेवून सिन्नरला गाठले. ओळखीच्या एका महिलेकडे जावून आपबिती सांगितली. त्यानंतर घटनेची माहिती नांदूरशिंगोटे पोलीस दूरक्षेत्रात देण्यात आली. अनोळखी युवकांकडे लिफ्ट मागून लुबाडणूक झालेली वृध्दा प्रचंड घाबरलेली होती. याप्रकरणी नांदूरशिंगोटे पोलीस दूरक्षेत्रात घडलेल्या घटनेची माहिती देण्यात आली होती. (वार्ताहर)