कामगार संघटनेचे सरचिटणीस सचिन ढोमसे यांच्या अध्यक्षतेखाली झालेल्या बैठकीत चर्चा करतांना माजी सरचिटणीस संजय कुटे, माजी सहचिटणीस अनिल मंडलिक, प्रशांत आहेर यांनी सांगितले, कामगार संघटनेचा त्रैवार्षिक कार्यकाळ १५ जूनला संपला असल्याने कामगार संघटनेची घटना व नियमावलींनुसार त्रैवार्षिक निवडणूक तत्काळ होणे गरजेचे आहे परंतु कोविड नियमांचे बंधन असल्याने जिल्हा आपत्ती व्यवस्थापनाकडून बॅलेट पेपरवरील निवडणुकीला परवानगी नाकारण्यात आली आहे तरीसुद्धा कामगार संघटनेपुढे (पारदर्शी स्वरूपाने) ऑनलाईन निवडणुकीचा पर्याय उपलब्ध आहे. कोरोनाच्या नावाखाली कामगार संघटनेची निवडणूक बॅलेट पेपरवर होणेसाठी अनिश्चित काळासाठी पुढे ढकलणे शक्य होणार नाही म्हणून ऑनलाईन निवडणुकीचा पर्याय वापरावा, असे सांगितले. ही निवडणूक कारखाना आवारातच होणार असल्याने नियमित ड्युटीप्रमाणेच कामगार संघटनेची त्रैवार्षिक निवडणूक प्रक्रियादेखील सर्व कामगार सुरळीत पार पाडतील, अशी ग्वाही दिली. यासंदर्भात कामगार संघटनेच्या विद्यमान पदाधिकाऱ्यांची बैठक बोलावून संघटनेची त्रैवार्षिक निवडणूक ऑनलाईन पद्धतीने परंतु पारदर्शी स्वरूपात कशाप्रकारे घेता येईल याबाबत चर्चा करून ठराव घेण्यात यावा, अशी मागणी बैठकीत करण्यात आली.
कोट...
कामगार संघटनेच्या घटना व नियमावलीनुसार निवडणूक तत्काळ होणे गरजेचे आहे. कार्यकाळ संपला असल्याने विद्यमान सत्ताधाऱ्यांनी सत्तेचा मोह सोडून लोकशाही मार्गाने निवडणूक घ्यावी, अशी कामगारांची मागणी आहे.
- संजय कुटे,
माजी सरचिटणीस,
एच. ए. एल. कामगार संघटना