सिडकोत युवकाला बेदम मारहाण

सिडकोत युवकाला बेदम मारहाण

सिडको : युवकास फोन करून बोलावून घेऊन तिघांनी बेदम मारहाण केल्याची घटना गणेश चौकात सोमवारी रात्री घडली़ दरम्यान, या घटनेची अंबड पोलीस ठाण्यात नोंद करण्यात आली आहे़
सिडको पोलिसांनी दिलेल्या माहितीनुसार, सिडकोतील गणेश चौकात असलेल्या गणेश मंदिराचे सध्या जीर्णोद्धाराचे काम सुरू असून, श्रावण महिन्यापर्यंत काम पूर्ण व्हावे यासाठी नागरिकांचे प्रयत्न सुरू आहेत़ त्यामध्ये चारुदत्त घोडके यांचाही समावेश आहे़ त्यांनीच चौकातील नागरिकांना एकत्र करून मंदिराचे काम करण्यास प्रवृत्त
केले़
या मंदिराच्या कामासाठी पुढाकार घेणाऱ्या चारुदत्त घोडके यांनी, मला विश्वासात घेतले नाही याचा राग गणेश सोनवणे याच्या मनात होता़ सोमवारी रात्री घोडके यांना गणेश चौकात फोन करून बोलावून घेत संशयित गणेश सोनवणे व त्याचे साथीदार नवज्योत ननरा, योगेश बागले या तिघांनी बेदम मारहाण केली़
यामध्ये घोडके यांचे डोके, हात व पायास गंभीर मार लागल्याने लेखानगर येथील लाइफ केअर हॉस्पिटलमध्ये दाखल करण्यात आले आहे़ दरम्यान, या घटनेनंतर हे तिघेही फरार झाले आहेत़ या प्रकरणी अधिक तपास उपनिरीक्षक सोनोने करीत आहेत़(वार्ताहर)