श्री गणेश बॅँकेत ‘बचाव’चा झेंडा बॅँकेत घडले परिवर्तन

श्री गणेश बॅँकेत ‘बचाव’चा झेंडा बॅँकेत घडले परिवर्तन

 नाशिक : श्री गणेश सहकारी बॅँकेच्या पंचवार्षिक निवडणुकीत १२ संचालकपदांच्या जागांसाठी काल (दि.२२) मतमोजणी होऊन बॅँकेत सत्ताधारी माधवराव मोरे यांच्या संघर्ष पॅनलचा शरद कोशिरे यांच्या नेतृत्वाखालील श्री गणेश बॅँक बचाव पॅनलने सर्व जागांवर विजय मिळवित धुव्वा उडविला. गणेश सहकारी बॅँकेसाठी शरद कोशिरे यांच्या नेतृत्वाखाली श्री गणेश सहकारी बॅँक बचाव पॅनलची निर्मिती करण्यात आली होती. १२ जागांसाठी २८ उमेदवार निवडणुकीच्या रिंगणात होते. सकाळी आठ वाजेपासून येथील समर्थ मंगल कार्यालयात मतमोजणीस सुरुवात झाली. श्री गणेश सहकारी बॅँकेसाठी ४ हजार ८८८ मतदार असून, रविवारी नाशिक येथील अभिनव बालविकास मंदिर, तसेच पिंपळगाव येथील क. का. वाघ महाविद्यालयात मतदान केंद्रावर ५३ टक्के मतदान झाले होते. सर्वसाधारण गटातील सात जागांसाठी १५ उमेदवार निवडणुकीच्या रिंगणात होते. त्यात सर्वाधिक मते कोशिरे यांच्या पॅनलमधील उमेदवारांना मिळाली. त्यात दीपक पिंगळे-१४४६, रमाकांत सूर्यभान पाटील-१४२६, विकास विठ्ठलराव सावंत-१४१७, उन्मेश डुंबरे-१३८७, रामनाथ मुंदडा-१३५३, श्यामराव तांबोळी-१३५१, प्रकाश खर्डे-१३४९ आदिंचा समावेश होता. या गटातून माधवराव मोरे यांच्यासह मुकुंद मोरे,भाऊसाहेब गवळी, शिवाजी बोराडे आदिंचा पराभव झाला. महिला राखीव गटाच्या दोेन जागांसाठी हिरा लक्ष्मण हांडगे-१४४० व छाया वाल्मीक निखाडे-१४०२ या दोन्ही महिला उमेदवार विजयी झाल्या. अनुसूचित जाती/जमाती संवर्गाच्या एका जागेसाठी राजाराम लोहकरे-१५०१ यांनी अरुण काळे यांचा पराभव केला. इतर मागास प्रवर्ग गटातून गणेश बॅँक बचाव पॅनलचे नेते शरद कोशिरे यांनी सर्वाधिक १५६२ मते मिळवून शिवाजी डुंबरे यांचा ७७८ मतांनी पराभव केला. विमुक्त जाती भटक्या जमाती विशेष मागास प्रवर्गाच्या एका जागेसाठी अलका रमेश सानप यांनी १५१० मते मिळवून सुनील सोनवणे यांचा ५३६ मतांनी पराभव केला. निवडणूक निर्णय अधिकारी म्हणून तालुका उपनिबंधक गोपाळ मावळे यांनी काम पाहिले. विजयानंतर शरद कोशिरे यांनी समर्थकांसह जल्लोष केला. बॅँकेच्या थकीत वसुलीसाठी शरद कोशिरे यांनी कष्ट घेऊन बॅँकेला पुन्हा ऊर्जितावस्थेत आणण्यासाठी प्रयत्न केल्यानेच सभासदांनी त्यांच्या पॅनलवर विश्वास टाकल्याचे निकालावरून स्पष्ट होते.(प्रतिनिधी)