सभागृहात बसणार सीसीटीव्ही कॅमेरे?

सभागृहात बसणार सीसीटीव्ही कॅमेरे?

नाशिक : जिल्हा परिषदेच्या पदाधिकाऱ्यामध्येच शीतयुद्ध सुरू असल्याची चर्चा असून, आगामी सर्व साधारण सभा अर्थात आमसभा सीसीटीव्हीच्या नजरेखाली होण्याची शक्यता आहे. जिल्हा परिषदेच्या नवीन प्रशासकीय इमारतीच्या सभागृहात सीसीटीव्ही बसविण्याबाबत प्रशासनाला एका पदाधिकाऱ्याने पत्र दिल्याचे समजते. काही दिवसांपूर्वीच झालेल्या वार्षिक अर्थसंकल्पाच्या सर्वसाधारण सभेत नेमके नियोजन काय घडले? त्यानुसार इतिवृत्त तयार करण्यात आले की नाही? त्यात काही दुरुस्ती करून इतिवृत्तात बिघाड करण्यात आला काय?अशा अनेक शंका काही पदाधिकाऱ्यांनी घेतल्या असून, त्यानुसार प्रशासनाकडे पाठपुरावा सुरू केला आहे. मुळातच वार्षिक अर्थसंकल्पाच्या विशेष सर्वसाधारण सभेत कोेणत्या विभागांची किती कपात झाली? कुठला निधी कुठे वळविण्याचा निर्णय झाला? याबाबत सविस्तर माहिती मुख्य लेखा व वित्त अधिकाऱ्यांच्या कार्यालयाकडे आहे. आता गेल्या काही दिवसांपासून या इतिवृत्तावरून पदाधिकाऱ्यांमध्ये धुसफूस सुरू आहे. त्यामुळेच की काय, एका पदाधिकाऱ्याने चक्क प्रशासनाला नवीन प्रशासकीय इमारतीतील सभागृहात सीसीटीव्ही कॅमरे बसविण्याबाबत पत्र देऊन लेखी मागणी केल्याचे समजते. अर्थात सीसीटीव्ही कॅमेरे हे बैठकीत काय निर्णय झाले? याची सचित्र माहिती मिळण्यासाठीच बसविण्याच्या दृष्टीने हे कॅमेरे बसविण्यात पत्र देण्यात आल्याचे कळते. आता या सीसीटीव्ही कॅमेऱ्यांच्या मागणीमुळे आधीच ध्वनिचित्रीकरणाच्या छायेखाली असलेली सर्वसाधारण सभा आता छायाचित्रणाखाली येण्याची चिन्हे आहेत.(प्रतिनिधी)