खासगी गुदामात रेशनचे धान्य प्रकरणी संशयाच्या भोवऱ्यात

खासगी गुदामात रेशनचे धान्य प्रकरणी संशयाच्या भोवऱ्यात

नाशिक : विल्होळी येथील खासगी गुदामात रेशनचे धान्य उतरविल्या प्रकरणी संशयाच्या भोवऱ्यात सापडलेल्या शहरातील तिन्ही रेशन दुकानांची माहिती जिल्हा पुरवठा कार्यालयाने मागविली असून, तशी नोटीस धान्य वितरण अधिकाऱ्यांना बजावण्यात आली आहे. दोन आठवड्यांपूर्वी विल्होळी शिवारातील एका खासगी गुदामात टेम्पोमधून धान्य उतरविले जात असल्याच्या संशयावरून नाशिक तहसील कार्यालयाने पोलिसांच्या मदतीने छापा मारला असता, जवळपास २३८ पोते गव्हाचा साठा सापडला होता. हा गहू रेशनचा असल्याच्या संशयाला पृष्टी देणारी बाब म्हणजे ज्या टेम्पोतून गहू उतरविला जात होता, त्या टेम्पोनेच नाशिकरोडच्या सरकारी धान्य गुदामातून नाशिक शहरातील रेशन दुकानांसाठी गहू उचलल्याचे चौकशीअंती स्पष्ट झाले. ज्या संशयित दुकानांचा तो साठा असल्याचे आढळून आले, त्या दुकानदारांनी कारवाईच्या भीतीपोटी रेशन दुकानातील गव्हाचा साठा योग्य असल्याचा दाखविण्याचा प्रयत्न केला; परंतु धान्य वितरण अधिकाऱ्यांनी केलेल्या तपासणीत ही बाब उघडकीस आली. मात्र घटना घडून बराच कालावधी उलटला तरी, जिल्हा पुरवठा कार्यालयाला अद्यापही या कारवाईचा अंतिम अहवाल सादर करण्यात आलेला नसल्यामुळे सदर दुकानांचा परवाना रद्द करण्यात अडचणी निर्माण झाल्या आहेत. सोमवारी या संदर्भात ठोस कार्यवाही होण्याची शक्यता व्यक्त केली जात आहे. (प्रतिनिधी)