सविस्तर वृत्त असे की, शहादा येथील वसंतराव नाईक महाविद्यालयाजवळील लक्ष्मीनगरात राहणारा व पिठाच्या गिरणीचा व्यवसाय करणारा पंकज प्रकाश तामसे (भोई) (२८) हा युवक २० जानेवारी रोजी पहाटेच्या सुमारास घरी कोणाला काही न सांगता संताप व नैराश्यात निघून गेला होता. त्याची दुचाकी सारंगखेडा येथील पुलावर आढळून आली. त्याने नदीपात्रात उडी घेतली असावी, असा संशय २० जानेवारी रोजी व्यक्त करण्यात आला होता. त्या अनुषंगाने टाकरखेडा येथील मच्छिमार व भोई समाजाच्या तरुणांनी त्याचा दिवसभर शोध घेतला. परंतु तो मिळून आला नाही. याबाबत मयत पंकज तामसेच्या नातेवाईकांनी सारंगखेडा पोलीस ठाण्यात माहिती दिली. सारंगखेड्याचे पोलीस निरीक्षक राजेश शिरसाठ यांनीही सहकाऱ्यांसोबत शोधमोहिमेत सहभाग घेतला.
शुक्रवारी सकाळी पंकजचा मृतदेह पाण्यावर तरंगताना आढळून आला. ही बाब त्याच्या कुटुंबीयांना समजताच शोककळा पसरली. पोलीस निरीक्षक राजेश शिरसाठ, पोलीस उपनिरीक्षक कोळी, रमेश पाटील, जितेंद्र सूर्यवंशी, विजय गावीत आदींनी सारंगखेडा व टाकरखेडा येथील मच्छीमारांच्या मदतीने मृतदेह बाहेर काढला. सारंगखेडा प्राथमिक आरोग्य केंद्रात वडाळीचे डॉ. राजन दुग्गड यांनी मृतदेहाचे शवविच्छेदन केले. त्यांना डॉ. कांतीलाल पावरा यांनी सहकार्य केले. मयत पंकजच्या पश्चात आई, वडील, पत्नी, दोन मुले, भाऊ, बहिणी असा परिवार आहे. शहादा येथे दुपारी तीन वाजता त्याच्यावर शोकाकूल वातावरणात अंत्यसंस्कार करण्यात आले.