येथील जिल्हा शिक्षण व प्रशिक्षण संस्था (डाएट) तसेच प्राथमिक व माध्यमिक शिक्षण विभाग यांच्या संयुक्त विद्यमाने वेबिनारचे आयोजन करण्यात आले. या वेबिनार मालिकेचे उद्घाटन राज्य शैक्षणिक संशोधन संस्था महाराष्ट्र राज्य, पुणेचे उपसंचालक विकास गरड यांच्या हस्ते करण्यात आले. शबरी मातेच्या जीवनातील श्रीरामभेटीचा प्रसंग वर्णन करून महिला सक्षमीकरणाचे महत्व विशद करतानाच महिला दिन सप्ताहाचे औचित्य साधत शिक्षण विभागाने आयोजित केलेला विशेष ऑनलाइन लाइव्ह वेबिनार उपक्रम अत्यंत कौतुकास्पद असल्याचे गौरवोद्गार डॉ. राजेंद्र भारूड यांनी यावेळी बोलताना काढले.
कार्यक्रमाला जिल्हा परिषदेचे मुख्य कार्यकारी अधिकारी रघुनाथ गावडे, उपमुख्य कार्यकारी अधिकारी डॉ. वर्षा फडोळ, डायटचे प्राचार्य डॉ. जे. ओ. भटकर, माध्यमिक विभागाचे शिक्षणाधिकारी मच्छिंद्र कदम गटशिक्षणाधिकारी डॉ. राहुल चौधरी यांची प्रमुख उपस्थिती होती. यावेळी सहाय्यक जिल्हाधिकारी तथा एकात्मिक आदिवासी विकास प्रकल्प अधिकारी वसुमना पंत यांनी त्यांचा प्रेरणादायी प्रवास व दिशा याविषयी अनुभव कथन करताना सांगितले की, महिलांनी स्वतः निर्णय घेणे व त्या निर्णयावर ठाम असणे आवश्यक आहे. स्वतःच्या परिश्रमातून ओळख कशी निर्माण होईल, यासाठी प्रयत्न होणे तेवढेच महत्त्वाचे असल्याचे मत त्यांनी व्यक्त केले. याप्रसंगी शहादा येथील स्त्रीरोगतज्ज्ञ डॉ. स्मिता जैन म्हणाल्या की, महिलांनी आरोग्याच्या दृष्टीने दक्ष राहाणे आवश्यक असून, आरोग्य म्हणजे काय, हे सांगत आरोग्याची व्याख्या स्पष्ट करून प्रकृतीनुसार आहार घ्यावा. ॲड. सीमा खत्री यांनी महिलांना संरक्षणाबाबत नियम व कायद्याचे काटेकोर पालन करणे आवश्यक असून, कामाच्या ठिकाणीदेखील महिलांसाठी कायदे असल्याचे सांगितले.
सूत्रसंचालन व उपस्थित मान्यवरांचे स्वागत संस्थेच्या अधिव्याख्यात्या डॉ. वनमाला पवार यांनी केले. मीनाक्षी गिरी यांनी प्रास्ताविक केले. या वेबिनारला जिल्ह्यातील शिक्षक, शिक्षिका, अंगणवाडी सेविका, मदतनीस बहुसंख्येने उपस्थित होते. यशस्वीतेसाठी जिल्हा शिक्षण व प्रशिक्षण संस्थेतील वरिष्ठ अधिव्याख्याता प्रवीण चव्हाण, रमेश चौधरी, अधिव्याख्याता बी. आर. पाटील, पंढरीनाथ जाधव, डॉ. संदीप मुळे तसेच विषय सहायक प्रकाश भामरे, संदीप पाटील, देवेंद्र बोरसे, उदय केदार, अलका पाटील यांनी परिश्रम घेतले. सोनल शिंदे यांनी आभार मानले.