भारतीय रेल्वेच्या धर्तीवर राज्य परिवहन महामंडळ प्रवाशांच्या सोयीसाठी व्हीटीएस यंत्रणा कार्यान्वित करीत आहे. ही यंत्रणा बसविल्यानंतर प्रवाशांना संबंधित बस कोणत्या भागातून धावत आहे, तिचे शेवटचे लोकेशन काय होते, संबंधित बसस्थानकावर येण्यास किती वेळ लागणार आहे. तसेच ती आता कोणत्या ठिकाणी धावत आहे. त्या ठिकाणापासून बसस्थानकात येण्यासाठी किती वेळ लागणार तसेच सुटण्याची आणि पोहोचण्याची वेळ प्रवाशांना समजण्यास मदत होणार आहे.
एस.टी. बस म्हटली तर रस्त्यात काही तांत्रिक अडचण आली म्हणजे प्रवाशांना खूपच वेळ बसस्थानकात बसून संबंधित बसची वाट पहावी लागत होती. यामुळे प्रवाशांचा वेळ वाया जात होता. मात्र आता एसटीने ही यंत्रणा लावून प्रवाशांच्या सोयीचे केले आहे. आपल्याला पाहिजे असलेली संबंधित बस यावेळी कुठे आहे व कधी पोहोचणार आहे याची योग्य माहिती प्रवाशांना आता या डिस्प्ले बोर्डच्या माध्यमातून मिळणार आहे. एसटीने बसविलेल्या या यंत्रणेचा प्रवाशांना फायदा होणार असून प्रवाशांनी एसटीचे आभार मानले आहेत.
बसस्थानकात लागले स्क्रीन
शहादा आगारातील कंट्रोल केबिनच्या बाजूला डिस्प्ले बोर्ड लावण्यात आले आहे. डिस्प्ले बोर्डच्या माध्यमातून कुठली बस कुठल्या मार्गावर धावत असून ती किती वेळेत बसस्थानकात येणार आहे याची माहिती मिळणे सोईचे होईल. बस सुटण्याची व पोहोचण्याची वेळ निश्चित असते ती वेळ प्रवाशांना या बोर्डाच्या माध्यमातून समजणार आहेत. बसचा अपघात झाल्यास त्याची माहिती व्हीटीएस यंत्रणेमुळे तात्काळ कळणार असल्याने आवश्यक ती मदत अपघातस्थळी येणे शक्य होणार आहे.
एस.टी. बसेसवर असणार अधिकाऱ्यांचे लक्ष
एसटीने नेमून दिलेल्या अधिकृत थांब्यावर बस न थांबल्यास त्याची माहिती महामंडळाला कळणार असून त्यामुळे संबंधित चालक किंवा वाहकावर कारवाई करणे शक्य होणार आहे.
यापुढे सर्व चालकांना नेमून दिलेल्या बसस्थानकांवर बस घेऊन थांबावेच लागणार आहे.
बस सध्या कुठल्या मार्गावर धावत आहे. तेथून बसस्थानकात यायला किती अवधी आहे. असा उशीर झाला तर त्याची माहिती प्रवाशांना मिळणार असून चालक वेळकाढूपणा करीत असेल तर कारवाई करता येणार आहे.
बसफेऱ्या व वेळापत्रक सुधारणार
एसटी बसस्थानकात येण्यामागची कारणे अनेक असतात याचा परिणाम अन्य बस फेऱ्यांवर होत असतो.
एसटीचे वेळापत्रक सुधारावे व बसची सद्यस्थिती प्रवाशांना कळावी यासाठी व्हीटीएस प्रणाली महत्त्वपूर्ण ठरणार आहे.
एखादी बस नादुरुस्त झाल्यास पुढील बसफे-यांवर त्याचा परिणाम होतो. मात्र आता ती माहिती काढून पुढील फेरीसाठी नवीन बस उपलब्ध करण्यात येणार आहे.
व्हीटीएस प्रणालीमुळे प्रवाशांना एस.टी. बस नेमकी कुठे आहे त्याची माहिती कळावी यासाठी राज्य परिवहन महामंडळातर्फे ही यंत्रणा बसवण्यात आली आहे. शहादा आगारात डिस्प्ले बोर्ड बसविण्यात आला असून त्याठिकाणी सर्व बसफेऱ्यांची माहिती उपलब्ध होणार आहे.
योगेश लिंगायत, आगारप्रमुख, शहादा
एसटीने सुरू केलेली व्हीटीएस यंत्रणा अतिशय सुंदर कल्पना असून याचा प्रवाशांना मोठा फायदा होऊन त्यांचा वेळ वाचणार आहे. या यंत्रणेमुळे कोणती बस कुठे आहे व ती कधी येणार हे प्रवाशांना डिस्प्ले बोर्डच्या माध्यमातून बघता येणार आहे.
प्रा. दत्ता वाघ, अध्यक्ष प्रवासी संघटना, शहादा