कोंढावळ येथील दोन रुग्णांचा दोन दिवसात मृत्यू झाला आहे. येथे ग्रामस्थांचे कोरोना चाचणी शिबिर घेण्यात आले. त्यात सुमारे १०० ग्रामस्थांच्या स्वॅबचे नमुने घेण्यात आले असून त्यातील बऱ्याच जणांचा अहवाल पॉझिटिव्ह येण्याची शक्यता असल्याने आरोग्य विभागाने त्याआधी उपाययोजना करण्याची गरज आहे. घरोघरी जाऊन कोरोना चाचणी करून येथील ज्येष्ठ नागरिकांना तातडीने कोरोना प्रतिबंधक लस देण्याची अपेक्षा व्यक्त होत आहे.
कोंढावळ गावात कोरोनासोबतच मलेरिया व टायफॉईडचे रुग्णही मोठ्या प्रमाणात आहेत. त्यामुळे गावाला पुरवठा करण्यात येणाऱ्या पाण्याचे नमुने तपासणी करण्याची मागणी होत आहे. दोन वर्षांपूर्वी येथे शुद्ध पाण्यासाठी लाखो रुपये खर्च करून फिल्टर प्लान्ट बसविण्यात आला आहे. मात्र ग्रामपंचायतीच्या दुर्लक्षामुळे तो कार्यान्वित होऊ शकलेला नाही. हा फिल्टर प्लान्ट त्वरित सुरू करून ग्रामस्थांना शुद्ध पाणी द्यावे व गावालगत असलेले उकीरडे हटविण्याची मागणी ग्रामस्थांनी केली आहे.