तळोदा : येथील सार्वजनिक बांधकाम विभागातील उपविभागीय अभियंत्याची इतरत्र बदली झाल्यामुळे दळणवळणाच्या दृष्टीने अतिशय महत्त्वाचे असलेले हे कार्यालय गेल्या वर्षभरापासून प्रभारीवर चालू आहे. साहजिकच प्रमुख अधिकाऱ्याअभावी रस्ते, पुलांची कामेदेखील रामभरोसेच आहेत. संबंधित यंत्रणेने दखल घेऊन कायमस्वरूपी अधिकारी नियुक्त करावा, अशी मागणी जोर धरू लागली आहे.
तळोदा येथील सार्वजनिक बांधकाम विभागातील तत्कालीन उपविभागीय अभियंता पी.जे. वळवी यांची गेल्या ऑगस्ट महिन्यात शहादा येथील बांधकाम कार्यालयात बदली झाली आहे. त्यामुळे येथे त्यांचा जागी नवीन अधिकारीच दिला नाही. याउलट या कार्यालयाच्या अतिरिक्त भार नंदुरबार येथील अधिकारी ई.जी. जगताप यांच्याकडे देण्यात आला आहे. गेल्या वर्षभरापासून त्यांच्याकडेच कार्यभार आहे. त्यामुळे जनतेच्या दळणवळणाच्या दृष्टीने अतिशय महत्त्वाचे असलेले हे कार्यालय प्रभारीवर सुरू आहे. संबंधित अधिकारी कामाच्या अतिरिक्त ताणामुळे न्याय देऊ शकत नाही. इकडे तालुक्यात अर्थसंकल्पीय रस्ते, फरशा, पुलांच्या कामाबरोबरच आमदार निधीतील अनेक कामे सुरू आहेत. साहजिकच ही कामे रामभरोसे चालू आहेत. विशेष म्हणजे इतर कर्मचाऱ्यांवर वचक नसल्यामुळे शुक्रवारी कार्यालयाकडे फेरफटका मारला असता शिपायाव्यतिरिक्त अक्षरशः शुकशुकाट असल्याचे चित्र दिसून आले होते. अगदी कामांसाठी लोक या कार्यालयाकडे हेलपाटे मारत असतात. तरीही कुणीच भेटत नाही. संबंधित अधिकारी व कर्मचाऱ्याचा तपास केला, तर सरळ साइटवर गेल्याचे सांगितले जात असते. त्यामुळे लोकांना निराश होऊन परतावे लागते. इतर प्रमुख अधिकाऱ्यांचादेखील वचक नसल्यामुळे कर्मचाऱ्यांची मनमानी प्रवृत्ती बळावली आहे. वास्तविक वर्षभरापासून प्रमुख अधिकाऱ्याचे पद रिक्त असताना नियमित अधिकारी दिला जात नाही. शिवाय या जिल्ह्याचे पालकत्व जिल्ह्यातील लोकप्रतिनिधींकडे असताना येथे अधिकाऱ्यांची वानवा असल्याने जनतेमधून नाराजीच्या सूर व्यक्त केला जात आहे. निदान ज्या- ज्या प्रमुख कार्यालयात अधिकाऱ्यांची पदे रिक्त आहेत. तेथे तरी दुसऱ्या अधिकाऱ्याच्या नियुक्तीसाठी ठोस प्रयत्न करावेत, अशी जनतेची मागणी आहे.
इतर अभियंत्यांची पदेही रिक्तच
तळोदा सार्वजनिक बांधकाम विभागात सहायक अभियंत्यांच्या जागादेखील रिक्तच आहेत. येथे पाच पदे मंजूर आहेत; परंतु प्रत्यक्षात दोनच अभियंते कार्यरत आहेत. शिवाय ही पदे दोन वर्षांपासून रिक्त आहेत. अजूनही इतरांची नियुक्ती त्या ठिकाणी करण्यात आलेली नाही. अतिरिक्त ताणामुळे साहजिकच कामांकडेदेखील पाहिजे तसे लक्ष दिले जात नसल्याचा नागरिकांच्या आरोप आहे. त्यामुळे कामांच्या दर्जाबाबतही साशंकता व्यक्त केली जात आहे. अभियंत्यांच्या अडचणीमुळे ठेकेदारांची मनमानीदेखील वाढली आहे.
शासनाने सार्वजनिक बांधकाम विभागातील उपविभागीय अभियंत्यांच्या वाढत्या रिक्तपदांची कार्यवाही सुरू केली आहे. थोड्या दिवसांत या बांधकाम कार्यालयासदेखील कायमस्वरूपी अधिकारी मिळणार आहे.
-ई.जी. जगताप, प्रभारी उपविभागीय अभियंता, सार्वजनिक बांधकाम कार्यालय, तळोदा