एसटीवरील सूचना फलकांचे गांभीर्य कोणालाच नाही

राज्य परिवहन महामंडळाच्या बसेसवर सध्या कोरोनाच्या वाढत्या प्रादुर्भावाच्या पार्श्वभूमीवर शासनाने जनजागृती करण्यासाठी मोठे फलक, बॅनर लावले आहेत आणि ते वाचून नागरिक, प्रवासी, जनता यांना मार्गदर्शन होऊन ते मास्क वापरतील व कोरोना संसर्ग कमी होईल, असा हेतू आहे. परंतु त्याचे फारसे गांभीर्य घेताना कोणी दिसत नाही. आपल्याला काय करायचयं, अशा अविर्भावात प्रवासी वागताना दिसून येत आहेत. परंतु आज प्रत्येक नागरिकाचे कर्तव्य आहे की, नियमांचे पालन केलेच पाहिजे तरच आपण कोरोनासारख्या जीवघेण्या रोगावर विजय मिळवून त्याला हरवू शकतो. म्हणून एसटी बसेसवर बाहेरून ‘मास्क नाही तर प्रवेश नाही’ असे बॅनर लावले आहेत. शासनाने वेळोवेळी दिलेले नियम आपणास पाळून अंमलात आणायचे आहेत, हे प्रत्येक नागरिकाचे कर्तव्य आहे. केवळ शासनाचा नियम म्हणून नाही. परंतु प्रत्येकाने स्वतःच्या आरोग्यासाठी व पर्यायाने आपल्या कुटुंबाच्या संरक्षणासाठी या सर्व नियमांचे पालन करणे काळाची गरज आहे, असे सुज्ञ नागरिकांमधून बोलले जात आहे.