लोकमत न्यूज नेटवर्क
नंदुरबार : ऑक्सिजन नगरी म्हणून ओळख ठरू पाहणाऱ्या नंदुरबार जिल्ह्यातील दुर्गम, अतिदुर्गम भागात सोईसुविधांच्या अभावामुळे ऑक्सिजन पुरवठा करण्यासाठी येणारी समस्या सोडविण्यासाठी भारतीय जैन संघाने पुढाकार घेतला आहे. या संघातर्फे २५० ऑक्सिजनचे जम्बो सिलिंडर जिल्ह्याला देण्यात येत असून, ते दुर्गम भागातील प्राणवायू ठरणार आहेत.
नंदुरबार जिल्ह्यात गेल्या वर्षापर्यंत एकही ऑक्सिजन प्रकल्प नव्हता. कोरोनाचा संसर्ग उद्भवल्यानंतर ऑक्सिजनची समस्या प्रकर्षाने जाणवू लागली. यापूर्वी धुळे, जळगाव, नाशिक, सुरत येथून ऑक्सिजन सिलिंडर येत होते. त्यामुळे ऐन वेळी गरज पडल्यास १०० ते २०० किलोमीटरवरून ऑक्सिजन सिलिंडर आणण्यात विलंब झाल्यास रुग्णांसाठी अडचण ठरू शकते. ही बाब लक्षात घेऊन जिल्हाधिकारी डॉ.राजेंद्र भारूड व जिल्हा शल्य चिकित्सक डॉ.रघुनाथ भोये यांनी पुढाकार घेऊन हवेतील ऑक्सिजन प्रकल्प उभा केला आहे. त्याचा विस्तारही केला, असे प्रकल्प शहादा, तळोदा आणि नवापूर येथेही सुरू करण्याची तयारी सुरू झाली. त्यामुळे ऑक्सिजनबाबत स्वयंपूर्ण होण्याची जिल्हा तयारी करीत असताना, दुर्गम, अतिदुर्गम भागातील प्रश्न मात्र प्रशासनापुढे चिंताजनक होता. धडगाव आणि अक्कलकुवा तालुक्यातील रुग्णांसाठी किमान प्राथमिक स्तरावर ऑक्सिजन पुरवठा करता यावा, यासाठी प्रशासनाचे नियोजन सुरू होते आणि तो चिंताजनक प्रश्नही ठरला होता.
या पार्श्वभूमीवर भारतीय जैन संघाने पुढाकार घेऊन आणि जिल्हा प्रशासनाच्या कार्याचे काैतुक करीत प्रशासनाला मदतीचा हात दिला. याबाबत मुंबईचे प्रसिद्ध उद्योगपती मोतिलाल ओसवाल यांनी जिल्हाधिकारी डॉ.राजेंद्र भारूड यांच्याशी संपर्क साधून त्यांनी मदतीची इच्छा व्यक्त केली. जिल्हाधिकाऱ्यांनी त्यांना जिल्ह्यासाठी नेमकी काय गरज आहे, त्याबाबतची भूमिका मांडली. त्यातून त्यांनी ऑक्सिजन जम्बो सिलिंडर देण्याची तयारी दर्शविली.
जिल्हाधिकाऱ्यांशी चर्चा झाल्यानंतर, मोतिलाल ओसवाल यांनी भारतीय जैन संघाला एक कोटी रुपयांची देणगी देऊन, त्यातून हा उपक्रम राबविण्याचा निर्णय घेतला. त्यानुसार, २५० ऑक्सिजन जम्बो सिलिंडर जिल्ह्याला मिळणार असून, त्यातील १०० सिलिंडर घेऊन बुधवारीच वाहन नंदुरबारकडे रवाना झाले आहे. गुरुवारी सकाळी हे सिलिंडर जिल्हा प्रशासनाच्या ताब्यात देण्यात येणार आहे.