नंदुरबार जिल्हा हा कोरोनामुक्तीकडे वाटचाल करत असल्याचे दिसून येत आहे. जास्तीत - जास्त संख्येने लसीकरण व्हावे, याकरिता अनेक ठिकाणी जनजागृती केली जात आहे. अशीच जनजागृती शहादा तालुका एज्युकेशन सोसायटी लि. शहादा संचलित जी.एस.विद्यामंदिर वडाळी येथील माध्यमिक व उच्च माध्यमिक शिक्षकांनी वडाळी ग्रामपंचायतीच्या सहकार्याने ‘करूया जनजागर लसीकरणाचा’ हा जनजागृती उपक्रम राबविला.
वडाळी गावाने कोरोना मुक्तीकडे वाटचाल केली असून गावातील शासकीय, निमशासकीय आस्थापना यांचा योग्य समन्वय, नागरिकांचे सहकार्य यामुळे गावात ४५ ते ६० वर्षांवरील नागरिकांचे जवळपास सुमारे ८० टक्के लसीकरण झाले आहे. उर्वरीत लसीकरणासाठी घरोघरी लसीकरणाची वारी केल्याशिवाय पर्याय नाही, असे दिसून आल्यावर जी. एस. विद्यामंदिरचे मुख्याध्यापक अंबालाल पाटील, पोलीस पाटील गजेंद्रगीर गोसावी, ग्रामपंचायत पदाधिकारी, दिनेश पाटील यांच्या विशेष संकल्पनेतून शिक्षकांनी जर आदिवासी पेहराव धारण करून आदिवासी बोलीभाषेत पारंपरिक संस्कृती जपत आदिवासी वाद्यासहित जर लसीकरण जनजागृती केली तर लोकांची मनातील भीती व अफवा दूर होऊन वडाळी गावात १०० टक्के लसीकरण झाल्याशिवाय राहणार नाही, असा विश्वास व्यक्त केला. म्हणून, प्रत्यक्ष शिक्षकांनी होळी सणाच्या वेळेस घातले जाणारे पारंपरिक आदिवासी वस्त्र परिधान केले व गावातील प्रत्येक चौकात पथनाट्य सादर करून ‘लस ले ताई कोरोना पई जाई’, ‘घाबरू नको ताई लस लेवा शिवाय आते ईलाज नाई’, ‘जरी नई काय दुखत तरी लस ल्या फुकट’, अशा सूचना देत लोकांना आवाहन केले. प्रांताधिकारी चेतन गिरासे यांनी स्वत: रॅलीमध्ये सहभाग घेत जनतेला लसीकरणाचे आवाहन केले. तालुका वैद्यकीय अधिकारी डाॅ. मनिलाल शेल्टे, मंडळाधिकारी साळवे, सरपंच जामसिंग भिल, पोलीस पाटील गजेंद्रगीर गोसावी, ग्रामविस्तार अधिकारी बी. बी. देसले यांनीही जनतेला लसीकरण करण्याचे आवाहन करत कला पथकाचे कौतुक केले. दरम्यान, राहिलेल्या लोकांनीदेखील आम्ही लसीकरणाला जाऊच असे आश्वासन दिले.
जी.एस.विद्यामंदिरातील शिक्षकांचा व ग्रामपंचायत प्रशासनाचा लसीकरणासंदर्भात भीती व अफवा दूर करण्यासाठीचा हा उपक्रम कौतुकास्पद आहे. यामुळे गावातील लसीकरणाचे उद्दिष्ट लवकरच पूर्ण होईल. - चेतन गिरासे, उपविभागीय अधिकारी, शहादा विभाग
आदिवासी संस्कृती जपत आपण जर आदिवासी वस्त्र परिधान करून बोलीभाषेतच जनजागर केला तर तो प्रभावी ठरू शकतो. यामुळे ही संकल्पना राबविली असून लोकांचा चांगला प्रतिसाद मिळाला. - अंबालाल पाटील, मुख्याध्यापक जी. एस. विद्यामंदिर, वडाळी.