तळोदा : प्रभागातील रेशन दुकान पुन्हा त्या ठिकाणीच त्वरित सुरू करण्यासाठी संबंधित दुकानदारांस महसूल प्रशासनाने आठ दिवसांचा अल्टिमेट दिला आहे. अन्यथा कारवाई करण्याचा इशारा देण्यात आला आहे. दरम्यान, पुरवठा शाखेने तेथील नागरिकांच्या तक्रारींची चौकशी केली असून, आता पुढील कारवाईकडे नागरिकांचे लक्ष लागले आहे. तळोदा शहरातील खान्देशी गल्ली परिसरातील ग्राहकांसाठी स्वतंत्रपणे सुरू केलेली रेशन दुकाने संबंधित दुकानदाराने प्रशासनास न माहिती देता इतरत्र स्थलांतरित केली होती. साहजिकच तेथील ग्राहकांची गैरसोय झाल्यामुळे सोमवारी त्यांनी तहसीलदारांकडे तक्रार केली होती. या तक्रारीची दखल घेऊन तहसीलदार गिरीश वाखारे यांनी तातडीने दुकानदार पिंपळे याना नोटीस बजावली होती. शिवाय पुरवठा शाखेसदेखील चौकशी करण्याचे आदेश दिले होते. पुरवठा निरीक्षक संदीप परदेशी यांनी खान्देशी गल्ली परिसरातील कार्डधारकांचे प्रत्यक्ष जबाब घेतले. तथापि काही ग्राहकच प्रत्यक्ष हजर झाले होते. सेनेचे पदाधिकारी बाहेर गेल्यामुळे ते येऊ शकले नाहीत. या कार्ड धारकांनी नियमानुसार धान्य मिळत असल्याचे पुरवठा निरीक्षकांना सांगितले. तथापि परिसरातून दीड किलोमीटर अंतरावर स्थलांतरित केलेले स्वतः धान्य दुकान सात, आठ दिवसांत पुन्हा येथे सुरू करण्याचा अल्टिमेटम दुकानदारांस देण्यात आला आहे. तसेच लेखी दुकानदाराने लिहून दिल्याची माहिती पुरवठा सूत्रांनी दिली. त्यामुळे हा दुकानदार केव्हा परिसरात पुन्हा दुकानं सुरू करेल याकडे नागरिकांचे लक्ष लागले आहे.
महसूल प्रशासनाच्या मिळालेल्या आदेशाने सोमवारी दुपारीच प्रत्यक्ष त्या ठिकाणी जाऊन चौकशी केली. मोजकेच शिधापत्रिका धारक आले होते. त्यांना रेशनबाबत विचारले असता माल नियमित व नियमानुसार मिळतो, असा जबाब दिला आहे. मात्र, दुकानदारांस येथे दुकान लावण्याबाबत आठ दिवसांचा अल्टिमेटम दिला आहे.
- संदीप परदेशी, पुरवठा निरीक्षक, पुरवठा शाखा, तहसील कार्यालय, तळोदा.