नंदुरबार : सध्या मोबाईलवर बँकिंग व्यवहार होत आहेत. यातच मोबाईलवरुनच काही मिनिटातच लाखोंचे कर्ज मंजूर करुन देतो. यासाठी हे ॲप डाऊनलोड करा, असे मेसेज मोबाईलवर सध्या खोऱ्याने येत आहेत. या संदेशांना बळी पडून अनेकजण ॲप डाऊनलोड करत आहेत. परंतु हे सर्व धोकेदायक असून यातून क्षणातच बँक खात्यातील पैसे काढून घेण्याचे प्रकार घडले असून यातून काहींची फसवणूक झाली आहे.
अत्यंत गंभीर अशा या प्रकारांमुळे नागरिकांनी सावधगिरी बाळगून काळजी घेणे गरजेचे आहे. ॲपच्या माध्यमातून व्यवहार करीत असताना बँक खाते रिकामे होईल, अशीच शक्यता असल्याने ॲप डाऊनलोडींगला बळी पडू नये असाच सल्ला सायबर सेल देत आहे. परिणामी ॲपद्वारे कोणत्याही प्रकारचा बँकिंग व्यवहार करताना काळजी ही प्रत्येकाने घेणे आवश्यक आहे. यातून फसवणूक टळून होणारे आर्थिक नुकसानही टळणार असल्याचे सायबर सेल सांगत आहे.
आजघडीस सर्वांकडे अँड्राॅईड मोबाईल आहे. आपले एखादे काम सुलभ आणि लवकर होण्यासाठी त्याचा वापर वाढला आहे. यातून मग ॲपद्वारे मेसेज येतात. ॲप अधिकृत आहेत का, याची खातरजमा वेळीच करायला हवी.
ॲप डाऊनलोड करताच बँक खाते साफ
ॲप डाऊनलाेड करत असताना त्याची अगोदर संपूर्ण माहिती घ्यायला हवी ; पण बहुतांश नागरिक असे करताना दिसत नाहीत. फसगत झाल्यावर ॲप बाबत नातेवाईक व कुटुंबीयांना माहिती दिली जाते.
आपल्याला येणारे मेसेज हे फेक आहेत की अधिकृत आहेत, याची सर्वात अगोदर खातरजमा करण्याची गरज आहे. कोणत्याही येणाऱ्या मेसेजला लागलीच प्रतिसाद देणे ही बाब समर्थनीय होऊ शकत नाही.
या आमिषापासून सावध !
मेसेजच्या माध्यमातून आपल्याला आर्थिक संदर्भातील काही मजकूर येऊ शकतो. येणारा मजकूर हा कदाचित फेकदेखील असू शकतो. ते वेळीच ओळखायला हवे.
कर्ज उपलब्ध करून दिले जाईल अथवा अमूक वस्तूंची खरेदी केल्यास घसघशीत सूट मिळेल , सारखे अनेक प्रकारचे मेसेज आल्यास त्याच्या मोहात आपण पडायला नको.
ऑनलाईन पैसे ट्रान्सफर आपण करू शकतात, त्याला काही आणि कोणत्याही प्रकारचा टॅक्स लागणार नाही, यासारखे बनावट मेसेज आपल्याला आल्यास प्रतिसाद देऊ नये.
केस १ : जिल्ह्यातील धडगाव व अक्कलकुवा या दोन तालुक्यात काही ठिकाणी ऑनलाईन फसवणुकीचे प्रकार घडले आहेत. इन्स्टंट लोन या संकल्पनेमुळे फसगत झाल्याचे समोर येते. यात बँकेची संपूर्ण माहिती भरायला लावून त्याचा वापर करत चार्जेसच्या नावाने पैसे कपात झालेल्यांची संख्या मोठी आहे.
केस २ : तळोदा तालुक्यातील एकाने उत्सुकतेपोटी अँड्राॅईड मोबाईल घेतल्यावर त्याचा वापर सुरु केला. सहा महिन्यांपूर्वी लोन हवे का, म्हणून मेसेज सुरु झाले होते. या मेसेजला बळी पडून संपूर्ण माहिती भरुन दिल्यानंतर एकाच्या खात्यातून साधारण १० हजारापेक्षा अधिक रक्कम कपात करण्यात आल्याचे सांगण्यात आले.
नागरिकांनी त्यांची होणारी फसवणूक टाळण्यासाठी काळजी घ्यायला हवी. ऑनलाईन व्यवहार करताना अथवा ॲपच्या माध्यमातून काम करत असताना त्याची पुरेशी माहिती जाणून घ्यावी. आर्थिक व्यवहारांपासून शक्यतो सावध रहावे.
- रवींद्र कळमकर, पोलीस निरीक्षक
मोबाईलवर आलेल्या मेसेजमध्ये सांगितल्याप्रमाणे ॲप डाऊनलोड करु नका.
ॲप डाऊनलाेड करण्यापूर्वी त्याची माहिती जाणून घ्या. त्यानंतरच ते ॲप डाऊनलोड करा.
चुकीने ॲप डाऊनलोड करुन फसवणूक झाली तर तातडीने यासंदर्भात पोलिसांना कळवा.