कोरोनाच्या वाढत्या प्रादुर्भावामुळे महाशिवरात्रीला भाविकांची किरकोळ वर्दळ दिसून आली. मंदिर ट्रस्टी व पोलीस प्रशासन यांच्या नियमानुसार आलेल्या भाविकांनी महादेवाचे दर्शन घेतले. गुरुवारी सकाळी नऊ वाजेपासून सायंकाळी पाच वाजेपर्यंत बऱ्यापैकी भाविकांची गर्दी दिसून आली. या वेळी आलेल्या भाविकांना दर्शन घेता यावे यासाठी मंदिर आणि पोलीस प्रशासनाने नियोजन केले होते. त्यानुसार पोलिसांनी सभामंडपात सोडताना पाच-पाच भाविक तर मंदिर गाभाऱ्यात चार-चार भाविकांना सोडण्यात आले होते.
याप्रसंगी भाविकांनी तोंडावर मास्क लावला आहे की, नाही याची खात्री पोलिसांकडून केली जात होती.
शहादाचे पोलीस निरीक्षक बुधवंत यांच्या मार्गदर्शनाखाली प्रकाशा पोलीस दूरक्षेत्राचे चार पोलीस कर्मचारी, महिला होमगार्ड ११ व पुरुष होमगार्ड आठ यांची मंदिर परिसरात नियुक्ती करण्यात आली होती.
तापी नदी घाट, केदारेश्वर मंदिर, गेटजवळ पोलिसांनी चोख बंदोबस्त ठेवला होता. मंदिर चौफुलीवरच बॅरिकेटिंग लावून वाहनांना अडविण्यात आले होते. तेथूनच मोजक्या लोकांना केदारेश्वर मंदिराच्या दर्शनासाठी सोडण्यात आले होते. महाशिवरात्रीला नेहमीप्रमाणे होणारी गर्दी व भंडाऱ्याचे आयोजन दिसून आले नाही, शिवाय मंदिर परिसरामध्ये बाहेरगावातील दुकानदारही आले नाहीत, एकंदरीत शासनाच्या सर्व नियमांचे पालन करत मोजक्याच लोकांनी दर्शन घेतले.
केदारेश्वर, काशी विश्वेश्वर, पुष्प दंतेश्वर, संगमेश्वर महादेव मंदिर, येथे भाविकांनी सोशल डिस्टन्सिंगचे पालन करीत घेतले दर्शन.
मंदिर प्रशासनाने लावले रुद्राक्षाचे झाड
केदारेश्वर मंदिर संस्थानचे अध्यक्ष रामचंद्र पाटील, संचालक सुरेश पाटील, अमोल पाटील, रामदास पाटील, रमेश साळी, आदींनी ऋषिकेश येथून आणलेले रुद्राक्षाचे झाड केदारेश्वर महादेवाच्या सान्निध्यात महाशिवरात्रीच्या दिवशी लावले.