अवैध कनेक्शनांना अभय
नियमित वीज बिल भरणाऱ्या लोकांकडून वसुली करण्याचे धोरण कंपनीचे अधिकारी व कर्मचारी राबवत असले तरी दुसरीकडे त्यांना तळोदा शहरात अनेक ठिकाणी अवैध वीज कनेक्शन दिसत नाही का असा संतप्त सवाल ग्राहकांकडून उपस्थित केला जात आहे. तळोदा शहरात आणि इतर ठिकाणी बांधकाम सुरू आहे त्या ठिकाणी अनेक लोकांचे अवैध वीज कनेक्शन दिसून येतात. त्याचप्रमाणे शहरातदेखील अनेक ठिकाणी अवैध कनेक्शन घेऊन वीजपुरवठा सुरू असतो. याकडे वीज वितरण कंपनीचे अधिकारी व कर्मचारी जाणीवपूर्वक दुर्लक्ष करत असल्याचा आरोप वेळोवेळी करण्यात आला आहे. या अवैध वीज कनेक्शनला वीज वितरण कंपनीचे अधिकारी व कर्मचाऱ्यांचे तर अभय नाही ना असा प्रश्नदेखील ग्राहकांकडून उपस्थित केला जात आहे. या अवैध वीज कनेक्शनची वसुली ज्यादा वीज बिलांच्या माध्यमातून अप्रत्यक्षपणे नियमित वीज बिल भरणाऱ्या ग्राहकांकडून केलीं जाते की काय असा संशयदेखील सर्वसामान्य ग्राहकांकडून व्यक्त करण्यात येतो. थकबाकीवरील व्याज माफ करावे. लॉकडाऊनच्या काळात अनेक ग्राहकांना जादा वीज बिले आली. अनेक ग्राहकांनी वीज बिल माफ होईल किंवा कमी होईल या आशेने बिल भरले नाहीत. त्यामुळे अनेक ग्राहकांचे बिल मोठ्या प्रमाणावर फुगले. त्यात जादा वीज देयकांची भर पडली. यामुळे हजारो रुपयांची वीज बिलांची थकबाकी प्रत्येक ग्राहकावर झाली. या वीज बिल थकबाकीवर वीज वितरण कंपनीकडून हजारो रुपयांचे व्याजदेखील आकारण्यात येत आहे. एकीकडे ग्राहक जादा वीज बिल भरत असताना त्यावर व्याज आकारून वीज वितरण कंपनीने सर्वसामान्य ग्राहकांचे कंबरडेच मोडले आहे. वीज बील भरणाऱ्या ग्राहकांना किमान थकबाकी वरील व्याज माफ करावे, अशी मागणी ग्राहकांकडून करण्यात येत आहे.
रीडिंग घेणाऱ्या एजन्सीला दंड
तळोदा शहरासह इतर भागात वीज मीटरची रीडिंग घेणाऱ्या एजन्सीला कंपनीकडून ३९ हजार रुपयांचा दंड आकारण्यात आल्याची माहिती वीज वितरण कंपनीच्या अधिकाऱ्यांनी दिली आहे. चुकीची रीडिंग येणे, अस्पष्ट रीडिंग घेणे व रीडिंग न घेता ग्राहकांना वीज बिल देणे, वेळेत रीडिंग न घेणे इत्यादी बाबी संबंधित वीज कंपनीच्या अधिकाऱ्यांच्या लक्षात आल्याने त्यांच्यावर ही कारवाई करण्यात आल्याचे सांगितले जाते. दरम्यान, एजन्सीला कंपनीकडून दंड झाला असेल तरी एजन्सीच्या या भोंगळ कारभाराचा फटका ग्राहकांना बसला. एजन्सीला दंड आकारला गेल्याने वीज बिलासंदर्भात मोठ्या प्रमाणात अनागोंदी होत असल्याचे शिक्कामोर्तब झाले असल्याचे सांगितले जाते.