नंदुरबार शहरातील धुळे चौफुलीवर शनिवारी भारतीय जनता पार्टीच्या महिला मोर्चाच्या पदाधिकाऱ्यांनी वनमंत्री संजय राठोड यांच्यावर पोलिसांनी गुन्हा दाखल करून मंत्रिमंडळातून बडतर्फ करावे या मागणीसाठी सकाळी साडेअकरा वाजता महिला जिल्हाध्यक्ष किन्नरी सोनार यांच्या नेतृत्वाखाली रास्ता रोको आंदोलन केले. यावेळी सहभागी महिलांनी सरकारच्या विरोधात घोषणाबाजी केली. आंदोलक महिलांना पोलिसांना ताब्यात घेऊन अटक केली त्यानंतर काही कालावधीत सुटका केली.
याबाबत जिल्हा प्रशासनाला दिलेल्या निवेदनात म्हटले आहे की, पूजा चव्हाण या तरुणीचा संशयास्पद मृत्यूप्रकरणी मंत्री राठोड यांच्याविरुद्ध तत्काळ गुन्हा दाखल करावा. पूजा चव्हाणचा ७ फेब्रुवारी रोजी मृत्यू झाला पूजाच्या मृत्यूला १९ दिवस उलटून गेले तरी पोलिसांनी या घटनेबाबत प्राथमिक अहवालदेखील दाखल केला नाही. पूजाच्या ऑडिओ क्लिपमधील संवाद संबंधित व्यक्तींची पोलिसांनी साधी चौकशीही केली. पोलीस हाताची घडी तोंडावर बोट ठेवत गप्प बसले आहेत. याचा अर्थ पोलिसांवर दबाव असल्याचा आरोप निवेदनात करण्यात आला आहे. निवेदनावर जिल्हाध्यक्ष किन्नरी सोनार, प्रदेश सदस्य सविता जयस्वाल, शहराध्यक्ष योगिता बडगुजर, नगरसेविका संगीता सोनवणे, जिल्हा उपाध्यक्ष सपना अग्रवाल, मनीषा निकम, भावना लोहार यांच्या स्वाक्षऱ्या आहेत.
*चौकट*
एका तरुणीच्या मृत्युकडे इतक्या असंवेदनशील
पद्धतीने पाहिले जात आहे याची खंत वाटते. पूजा चव्हाणच्या मृत्युबाबत जे पुरावे बाहेर आले आहेत. त्या सर्व पुराव्यांतून या प्रकरणाशी वनमंत्री संजय राठोड यांचा संबंध आहे हेच दिसून येते. मात्र, सरकारकडून मंत्री राठोड यांना अभय दिले जात असल्याचेही दिसून येते आहे. मुख्यमंत्र्यांनी राठोड यांचा तातडीने राजीनामा घ्यावा. राजीनामा दिला नाही तर त्यांना मंत्रिमंडळातून बडतर्फ करावे. राठोड यांचा राजीनामा घेतला जात नाही. तोपर्यंत आम्ही आंदोलन चालूच ठेवू.
-किन्नरी सोनार
जिल्हाध्यक्ष, महिला मोर्चा, भाजप.