शहादा नगरपालिकेच्या ऑनलाइन झालेल्या विशेष सर्वसाधारण सभेत सन २०२१-२२ च्या अर्थसंकल्पावर चर्चा करण्यात आली. सभेत शहरातील महत्वपूर्ण कामांवरही चर्चा करण्यात आली. अर्थसंकल्पातील महत्त्वाच्या तरतुदींची माहिती मुख्याधिकारी राहुल वाघ यांनी सभागृहास दिली. दैनंदिन स्वच्छता पाणीपुरवठा, पथदिवे, जलनिस्सारण, प्रधानमंत्री आवास योजना, दलित वस्ती अंतर्गत रस्ते, कोरोना प्रादुर्भावाच्या पार्श्वभूमीवर विविध उपायोजना, मतदार अपघात विमा इत्यादीसह इतर विकास कामांकरिता १०१.३५ कोटींच्या अर्थसंकल्पात प्राधान्य देण्यात येत असल्याचे नमूद करण्यात आले .
नगरपरिषदेच्या ऑनलाइन झालेल्या विशेष सर्वसाधारण सभेत सर्व नगरसेवकांनी सक्रिय सहभाग घेतला. गटनेते प्रा.मकरंद पाटील यांनी घनकचरा व्यवस्थापनाबाबत तसेच दररोज बाजार व आठवडे बाजार उत्पन्न वाढविण्याबाबत उपयुक्त सूचना केल्या. नगरसेवक लक्ष्मण बढे यांनी वॉर्डनिहाय खर्चाच्या तरतुदींबाबत विचारणा केली. पाणीपुरवठा सभापती शमीमबी कुरेशी यांनी सूचविलेल्या मतदार अपघात विमा उतरविण्याबाबत सभेत चर्चा झाली. उपाध्यक्षा रेखाबाई चौधरी, आनंदा पाटील व इतर नगरसेवकांनीही चर्चेत सहभाग घेतला व उपयुक्त सूचना केल्या. चर्चेअंती सर्वानुमते सन २०२१-२२ च्या अर्थसंकल्पास मंजुरी देण्यात आली. सभेच्या मान्यतेनंतर पुढील मंजुरीसाठी जिल्हाधिकारी यांच्याकडे अर्थसंकल्प पाठविण्यात येणार आहे.
शहरातील अनेक भौतिक सुविधांचा अर्थसंकल्पात समावेश आहे. अर्थसंकल्पातील तरतुदी पाहता येत्या वित्त वर्षात विकासाचे नवे पर्व पहावयास मिळेल, असे मत नगराध्यक्ष मोतीलाल पाटील यांनी व्यक्त केले.
यापूर्वी अशी ऑनलाइन सभा घेताना आलेल्या तांत्रिक अडचणींचा आढावा घेत त्यावर मात करून प्रथमच यशस्वीरित्या ऑनलाइन पध्दतीने नगरपरिषदेची सर्वसाधारण सभा कामकाज हाताळण्यामध्ये अधीक्षक भाऊसाहेब देशमुख, कार्यालय पर्यवेक्षक माधव गाजरे, संगणक अभियंता मंगेश गायकवाड यांनी महत्त्वपूर्ण भूमिका निभावली. लेखापाल माळोदे यांनी अंदाजपत्रकातील महत्त्वाच्या तरतुदी विशद केल्या.