शहादा शहर व तालुक्यात कोरोनाची व्याप्ती वाढत आहे. ती कमी करण्यासाठी शासन स्तरावर वेगवेगळे उपाय योजले जात आहे. मार्च महिन्यात रुग्णसंख्या मोठ्या प्रमाणात वाढली आहे. दिवसागणिक बाधित रुग्णांची संख्या वाढत आहे. शासकीय तसेच खाजगी रुग्णालयेही फुल्ल झाले असून नागरिकांनी सजग राहणे गरजेचे आहे. अनावश्यक घराबाहेर निघणे टाळावे, महत्त्वाचे काम असल्यास घराबाहेर निघताना मास्क परिधान करावा, सोशल डिस्टन्सिंगचा वापर करावा, दूध, भाजीपाला, किराणा आदी तत्सम वस्तूंच्या घरपोच सेवेस प्राधान्य द्यावे, असे आवाहनही डॉ.गिरासे यांनी केले आहे.
गेल्या काही दिवसांपासून शहरासह तालुक्यात कोरोनाचा कहर सुरू आहे. साखळी तोडण्यासाठी प्रशासनाकडून शर्तीचे प्रयत्न सुरू आहेत. नागरिकांनी आजार लपवू नये, सौम्य लक्षणे आढळली तरी कोरोना चाचणी करून घ्यावी, डॉक्टरांच्या सल्ल्यानुसारच उपचार करावेत, आवश्यकता असल्यास रुग्णांना रुग्णालयात दाखल करून घ्यावे. अनावश्यक काळजी न करता नागरिकांनी कोरोनापासून बचाव करण्यासाठी मास्कचा वापर करावा, सोशल डिस्टन्सिंग राखावे. लॉकडाऊनच्या काळात नागरिकांनी त्रिसूत्रीचा वापर करावा. घरीच थांबून प्रशासनास सहकार्य करावे, असे आवाहन करण्यात आले.
कोरोना बाधित रुग्णांना ऑक्सिजनची कमतरता भासू नये यासाठी मोहिदे त.श., ता.शहादा येथील शासकीय कोविड सेंटरमध्ये प्रशासनाने भविष्यातील धोका ओळखून तात्काळ २० ऑक्सिजन बेड तयार केले असून दोन दिवसात ते कार्यान्वित होतील. रविवारी प्रांताधिकारी डॉ.चेतनसिंग गिरासे यांनी भेट देऊन पाहणी केली. या वेळी तालुका वैद्यकीय अधिकारी डॉ.राजेंद्र वळवी उपस्थित होते. ऑक्सिजन बेडसाठी स्वतंत्र स्टाफ कार्यान्वित असेल. याआधीच १२० बेड कमी लक्षणे अथवा लक्षणे नसलेल्या रुग्णांसाठी उपलब्ध असल्याचे त्यांनी सांगितले.