Fwd: उमरी : बी. व्ही. चव्हाण
उमरीत तहसील कार्यालयाला जत्रेचे स्वरूप
* प्रशासनाच्या नियोजनाचा उडाला फज्जा
लोकमत न्यूज नेटवर्क
उमरी ग्रामपंचायत सार्वत्रिक निवडणुकीच्या निमित्ताने उमरी तहसील कार्यालयात उमेदवारी अर्ज भरण्याच्या शेवटच्या दिवशी एकच झुंबड उडाली असून, निवडणूक विभागाच्या नियोजनाचा मात्र पुरता फज्जा उडाल्याचे दिसून आले. तहसील कार्यालय तसेच आजूबाजूचा एक किलोमीटरचा परिसर कार्यकर्ते व दुचाकी, चारचाकी वाहनांनी भरून गेला आहे. गोरठा रस्त्यावर तहसील कार्यालय असून, या रस्त्याने पुढे एकही वाहन जाऊ शकले नाही, अशी परिस्थिती आज बुधवारी सकाळपासूनच निर्माण झाली. त्यामुळे या रस्त्यावरील वाहतूक पूर्णतः खोळंबली. पोलिसांनाही ही वाहतूक सुरळीत करणे अशक्य झाले. ऑनलाइन उमेदवारी अर्ज भरण्यासाठी गेल्या चार दिवसांपासून सर्व्हर डाऊनचा अडथळा निर्माण झाला. त्यामुळे लोकांना उमेदवारी अर्ज दाखल करता आले नाहीत. आज शेवटच्या दिवशी ऑफलाइन पद्धतीने अर्ज भरण्यास निवडणूक आयोगाने मुभा दिल्यानंतर इच्छुकांनी अर्ज भरण्यासाठी येथे मोठ्या प्रमाणात गर्दी केली. ५७ गावांतील पॅनलप्रमुख, उमेदवार सहकारी कार्यकर्ते, महिला, वृद्ध यांच्यामुळे तहसील कार्यालय व परिसरात तोबा गर्दी झाली. फेरीवाले, हॉटेल्स, चहा टपरी आदी व्यावसायिकांची मात्र चांगलीच चांदी झाली. विशेष म्हणजे कोरोना साथरोगाचा अजूनही धोका कायम आहे. मात्र, येथे कसल्याच प्रकारचे नियम पाळण्यात आले नाहीत. जो-तो आपला उमेदवारी अर्ज दाखल करण्यासाठी आपल्याच तंद्रीत असल्याचे दिसून आले. विशेष म्हणजे तहसील कार्यालयात नागरिकांना बसण्यासाठी सोय, तसेच पाणी आदी कुठलीच व्यवस्था करण्यात आलेली नव्हती. अनेक महिला, वृद्धांना रांगेमध्ये जमिनीवर बराच वेळ बसून राहावे लागले.