पथदिवे दुरुस्ती
नांदेड : छत्रपती चौक ते मोरया चौक, विश्रामगृह या रस्त्यावरील दिवे दुरुस्ती करण्यात येत आहे. बुधवारी दिवसभर सदर रस्त्यावरील पथदिवे दुरुस्ती आणि देखभाल करण्यात आली. या रस्त्यावर मोरया टॉवरच्या वळणावर असलेला पथदिवा गायब झाला असून त्या ठिकाणी नवीन पथदिवा बसविण्यात यावा अशी मागणी होत आहे.
हॉटेलांमध्ये गर्दी
नांदेड : सध्या ग्रामपंचायत निवडणुकीचे बिगुल वाजलेले असून उमेदवारी अर्ज दाखल करण्याचा बुधवार हा शेवटचा दिवस होता. त्यामुळे नांदेड तहसील कार्यालय परिसरात इच्छुक उमेदवारांसह कार्यकर्त्यांची चांगलीच गर्दी आहे. या परिसरात असलेल्या हॉटेलमध्ये तुडुंब गर्दी पहायला मिळत आहे. निवडणुकांमुळे हॉटेल चालकांची चांदी होत आहे.
पेवर्स ब्लॉकचे काम सुरू
नांदेड : शेतकरी पुतळा ते गजानन महाराज मंदिर कमान या मुख्य रस्त्याच्या दोन्ही बाजूंना पेवर्स ब्लॉक टाकण्याचे काम सुरु आहे. हे काम करण्यासाठी दोन्ही बाजूच्या रस्त्याने खोदकाम करण्यात येत आहे. त्यामुळे दुतर्फा असलेल्या झाडांच्या मुळ्या तुटल्या जात आहेत. परिणामी बहुतांश झाडे सुकत आहेत. याकडे प्रशासनाने लक्ष देण्याची गरज आहे.