खासगी बाजारपेठेत हरभरा वाढला
हिमायतनगर : केंद्र शासनाकडून हरभऱ्याला ५१०० रुपयांचा हमीभाव जाहीर करण्यात आला. दुसरीकडे खासगी बाजारपेठेत आठ दिवसांपासून ५२०० चा भाव आहे. त्यामुळे हमीभाव खरेदी केंद्राकडे शेतकऱ्यांनी पाठ फिरविली असून खासगी व्यापाऱ्यांकडे हरभरा विक्री करण्याकडे जात आहेत. केंद्राने हरभऱ्याचे भाव वाढविल्यास पुन्हा शेतकरी वळतील.
बियाणे, खतांची आवक वाढली
धर्माबाद :येथील व्यापाऱ्यांनी खरीप हंगामाची तयारी सुरू केली, या हंगामात खते, बियाणांची वाढती मागणी लक्षात घेऊन व्यापाऱ्यांनी आतापासूनच साठा करण्यास सुरुवात केली. खत आणि बियाणांची आवक सुरू झाली. मे महिन्याच्या शेवटच्या आठवड्यापासून खरीप हंगामासाठी खरेदीला प्रारंभ होईल, अशी व्यापाऱ्यांना अपेक्षा आहे.
रेल्वेगाड्या नसल्याने प्रवाशांची गैरसोय
मुदखेड : दक्षिण मध्य रेल्वेच्या नांदेड विभागाने मागील आठवड्यात ११ रेल्वे गाड्या प्रवासी संख्येअभावी बंद केल्याने प्रवाशांची गैरसोय वाढली आहे. परजिल्ह्यात प्रवास करण्यासाठी नागरिकांना रेल्वेची सुविधा होती. ती देखील प्रशासनाने बंद केल्याने बाहेर जिल्ह्यात प्रवासासाठी कोणतीच सुविधा उपलब्ध नसल्याने प्रवाशांची गैरसोय होत आहे.
ग्रामीण भागात पाणीटंचाई
बिलोली : तालुक्यातील ग्रामीण भागातील पाणीपुरवठा योजनांच्या जलस्रोतांचे पाणी आटल्याचे ग्रामस्थांना पाणी टंचाईचा सामना करावा लागत आहे. नळ योजनेला पाणी येत नाही. शेत-शिवारातून पाणी आणावे लागते. जिल्हा प्रशासनाने याकडे लक्ष देण्याची मागणी होत आहे.
भाजीपाल्याचे नुकसान
माहूर : बाजारपेठा बंद असल्याने भाजीपाल्याचे मोठे नुकसान होत आहे. मोठ्या प्रमाणात भाजीपाला शिल्लक राहत असल्याने विक्रेत्यांसह उत्पादकांनाही आर्थिक फटका बसत आहे. विक्रीला परवानगी देण्याची गरज आहे.
साहित्य गायब
अर्धापूर : शहरातील विविध विभागांमध्ये उभारलेल्या हातपंपांचे साहित्य गायब झाले आहे. त्यामुळे सार्वजनिक हातपंप बंद असून नागरिकांना पाण्यासाठी वणवण भटकंती करावी लागत आहे. नगरपंचायतीने हे पंप सुरू करावेत, अशी मागणी आहे.
कलावंतांची कोंडी
नांदेड : सध्या संचारबंदी लागू करण्यात आल्याने कलावंतांना जनजागृतीसाठी कामे मिळत नसून कलावंतांची आर्थिक कोंडी होत आहे. कलावंतांसाठी शासनाने अनुदानाची तरतूद करावी, अशी मागणी होत आहे.
वाळू घाटांच्या लिलावांना प्रतिसाद मिळेना
नांदेड : जिल्ह्यातील वाळूघाटांच्या लिलावांना प्रतिसाद मिळत नसल्याने हे लिलाव बंद करण्यात आले आहेत. जिल्हा प्रशासनाने जवळपास १२ ते १५ वाळू घाटांचे लिलाव ठेवले होते. मात्र, अपेक्षित प्रतिसाद न मिळाल्याने लिलाव रखडले आहेत. त्यामुळे या वाळूघाटातून अवैध वाळू उपसा होण्याची शक्यता आहे.
पूर्व वैमनस्यातून मारहाण
बिलोली : तालुक्यातील सगरोळी येथे पूर्व वैमनस्यातून मारहाणीची घटना घडली. सगरोळी येथील सायगौडा बसवगौडा यांना जुन्या भांडणाच्या कारणावरून आरोपीने मारहाण केली. यामध्ये त्यांच्या मनगटावर मार लागल्याने फॅक्चर झाले. आरोपीने त्यांना जीवे मारण्याचीही धमकी दिली.
नायगावात व्यापाऱ्यांना दंड
नायगाव : लॉकडाऊन नियमांचे उल्लंघन करणाऱ्या चिद्रावार फॅमिली शॉप व चिद्रावार वस्त्रालय यांना तहसीलदार गजानन शिंदे व नगरपंचायतीच्या पथकाने ४० हजारांचा दंड आकारला. दंडात्मक कारवाईनंतरही शनिवारी छुप्या पद्धतीने व्यवहार सुरू होते. या कारवाईत तहसीलदार गजानन शिंदे, मुख्याधिकारी नंदकिशोर भोसीकर, कार्यालयीन अधीक्षक संतराम जाधव, शेख युनुस, रामेशल्वर बापुले, श्रीधर कोलमवार, संभाजी भालेराव, गणेश चव्हाण आदी सहभागी होते.
पेरणीपूर्व शेती कामात व्यस्त
फुलवळ : फुलवळ परिसरातील शेतकरी खरीप हंगामासाठी शेतीच्या तयारीसाठी कामाला लागले आहेत. कोरोनामुळे अनेक शेतकरी कुटुंबियांनी आपले घर शेतातच हलविल्यामुळे सकाळी लवकरच शेतातील कामे उरकण्यासाठी वेळ मिळत आहे. शेणखत टाकणे, नांगरणी करणे याचबरोबर हळद वाळवणे यासारखी कामे कुटुंबातील सदस्य करीत आहेत. वेळ व पैसाही वाचत असल्याने कोरोनापासून वाचण्यासाठी ही कामे उपयोगी ठरत आहेत.
धर्माबादेत भाजपच्यावतीने निषेध
धर्माबाद : पश्चिम बंगालमधील हिंसाचाराच्या घटनेचा धर्माबाद भाजपच्या कार्यकर्त्यांनी निषेध केला. यावेळी जिल्हा उपाध्यक्ष रवींद्र पोतगंतीवार, साईनाथ शिरपुरे, नगरसेवक संजय पवार, रामेश्वर गंदेलवार, सतीश मोटकुल, अंकीत गोधा, अमित मुंदडा, निलेश मंगनाळीकर, माधव पाटील, संजय पाटील आदी उपस्थित होते.
जिल्हा बँकेच्या शाखेची मागणी
किनवट : तालुक्यातील शिवणी जिल्हा मध्यवर्ती बँकेची शाखा सुरू करण्यात यावी, अशी मागणी होत आहे. इस्लापूर येथे एकमेव शाखा सुरू असल्याने शिवणी, इस्लापूर, जलधरा येथील लोकांची मोठी गर्दी होते. पूर्वी शिवणी, इस्लापूर, जलधरा येथे बँकेच्या शाखा होत्या. मात्र त्या डबघाईस आल्याने बंद करून इस्लापूर येथे एकत्रित करण्यात आले होते.
रेशन कीटचे वाटप
नांदेड : पराग सामाजिक बहुद्देशीय सेवाभावी संस्थेच्यावतीने दिव्यांग व कोरोनाने मृत्यू पावलेल्या कुटुंबियांना रेशन कीटचे वाटप करण्यात आले. संस्थेचे अध्यक्ष सूर्यकांत गवळे, सचिव जयश्री गवळे, प्राचार्य कान्हा शिरसाठ, नवनाथ भद्रे, रणजीत गवळे, डॉ. पराग गवळे, पायल गवळे आदी यावेळी उपस्थित होते.