सुमेध वाघमारेनागपूर : नागपुरात ‘कोव्हीड-१९’ रुग्णांची संख्या १२७ वर गेली आहे. रुग्णांची वाढती संख्या लक्षात घेऊन जिल्हाधिकारी रविंद्र ठाकरे यांनी शुक्रवारी आणखी एका खासगी प्रयोगशाळेला नमुने घेण्याची परवानगी दिली. मात्र खासगी हॉस्पीटलमध्ये भरती असलेल्या रुग्णांचेच नमुने घेण्याची अट असल्याने सामान्यांचे नमुने तपासणार कधी? असा प्रश्न उपस्थित केला जात आहे. मुंबईत १९ खासगी प्रयोगशाळेला नमुने घेण्याची व तपासण्याची परवानगी आहे. यातही नमुने देऊन घरी जाण्याची मुभा आहे. पॉझिटिव्ह आल्यावर रुग्णालयात दाखल केले जात आहे. यामुळे रोज मोठ्या संख्येत नमुने तपासले जात आहे. परिणामी जास्तीत रुग्ण उपचाराखाली येऊन त्यांच्या संपर्कात आलेल्यांना क्वारंटाइन करून त्यांचे नमुने तपासले जात आहे. नागपुरात मुंबई सारखी स्थिती नाही. परंतु रोज रुग्ण वाढत असल्याने नमुने तपासण्याची गती वाढविण्यावर वैद्यकीय तज्ज्ञ जोर देत आहेत. नागपुरात दोन लॅबला परवानगी असलीतरी त्यांच्यावर अटी लादून दिल्या आहेत. यात खासगी रुग्णालयात भरती असलेल्या रुग्णांचेच नमुने घेण्याची अट आहे. नमुने देण्यासाठी संशयिताला लॅबमध्ये येता येणार नाही. लॅबचा टेक्निशियन सुरक्षेचे सर्व साधने घालू संबंधित हॉस्पिटलमध्ये जाऊन रुग्णाचे नमुने घेईल. त्यानंतर ते नमुने मुंबईच्या प्रयोगशाळेत पाठविले जाईल. हे नमुने रुग्णवाहिकेतून किंवा रेल्वेने पाठविले जातील. एका नमुनाचे तपासणी शुल्कही साडेचार हजारावर नको, अशीही अट आहे. यामुळेच पहिल्या लॅबकडून आतापर्यंत केवळ ३० नमुने गोळा करून त्याचा अहवाल दिला आहे. विशेष म्हणजे, या दोन्ही लॅबकडे कोरोना विषाणूची निदान करणारी यंत्रसामूग्री, जागा व तज्ज्ञ आहेत. याच धर्तीवर त्यांन नमुने तपासणीसाठी ‘आयसीएमआर’ला परवानगीही मागितली आहे. परंतु अद्यापही मिळालेली नाही. वैद्यकीय तज्ज्ञाच्य मते, खासगी लॅबला ‘ओपीडी’ स्तरावर नमुने घेण्याची परवानगी मिळाल्यास मोठ्या प्रमाणात नमुने तपासले जाऊ शकतील. महत्त्वाचे म्हणजे, जी व्यक्ती संशयित आहे, परंतु त्याला मेयो, मेडिकलमध्ये जाण्याची भिती वाटते, त्यांच्यासाठी खासगी लॅब सोयीचे ठरेल. शासनाने यावर तातडीने निर्णय घेणे आवश्यक असल्याचेही त्यांचे म्हणणे आहे.