जिल्हा बँकेवर कारवाई : बँक अपील करणार
नागपूर : भारतीय रिझर्व्ह बँकेने नागपूर जिल्हा सहकारी बँकेवर अवसायक नियुक्तीचे आदेश सहकार आयुक्तांना दिल्यानंतर बँकेच्या आर्थिक व्यवहारावर निर्बंध आले आहेत. त्यामुळे शिक्षकांचे एप्रिल महिन्याचे पगार आता विड्रॉल होणार नाही. शिक्षकांचे पगाराचे ४२ कोटी रुपये बँकेत जमा आहेत. या वेळी शिक्षण खात्याकडून पगाराचे धनादेश बँकेत उशिरा आले. धनादेश बँकेत जमा झाल्यानंतर दोनच दिवसात बँकेवर कारवाई झाली. मे महिन्यात शिक्षकांना सुट्या लागल्याने त्यांनीही पगाराचे पैसे विड्रॉल केले नाहीत. या सर्व घडामोडींमुळे आता शिक्षक संघटनांची ओरड पुन्हा सुरू झाली आहे. युनियन बँकेतून पगार करण्याची त्यांची मागणी जोर धरू लागली आहे. युनियन बँकेत सर्वच शिक्षकांचे खाते उघडले आहे. मुख्यमंत्र्यांच्या आदेशामुळे जिल्हा बँकेतूनच पगार सुरू होते. पण आता कारवाईमुळे शिक्षकांचे पगार संकटात आले आहेत. बँक सोमवारी अपील करणार रिझर्व्ह बँकेच्या अवसायक नियुक्तीच्या आदेशामुळे जिल्हा बँकेचे आर्थिक व्यवहार बंद आहेत. व्यवहार बंदीचे आदेश शिथिल करावेत, यासाठी जिल्हा बँक सोमवारी केंद्र शासनाच्या वित्त विभागाकडे अपील करणार आहे. अपिलासह शासनाचे आर्थिक मदतीचे आणि सहकार आयुक्तांचे पत्र जोडणार आहे. यावर वित्त विभाग एक महिन्याची मुदत देईल, अशी अपेक्षा आहे. या एक महिन्याच्या काळात शासनाची मदत मिळाल्यानंतर बँकेचे व्यवहार सुरळीत होण्याची शक्यता आहे. शेतकर्यांना कर्जवाटप नाही यंदा आर्थिक तरलतेअभावी बँक शेतकर्यांना कर्जवाटप करू शकत नाही. बँकांच्या परवान्याचे प्रस्ताव रिझर्व्ह बँकेने नामंजूर केले आहेत. यासंदर्भात १६ मे रोजीच पणन विभागाने सहकार आयुक्त व निबंधकांना पत्र पाठविले आहे. दरम्यान, रिझर्व्ह बँकेच्या ९ मे २०१४ च्या आदेशाविरुद्ध केंद्र सरकारकडे अपील दाखल करण्याबाबत बँकांचे प्रशासक यांना आपल्या स्तरावरून त्वरित निर्देश देण्यात यावे व त्याबाबतच अहवाल सरकारकडे तत्काळ सादर करावा, अशी विनंती सहकार विभागाच्या विशेष कार्य अधिकार्यांनी सहकार आयुक्तांना केली आहे.