वेकोलित चालतात एकाच क्रमांकाच्या दोन सुमो!

एका जिल्ह्यात एकाच क्रमांकाची दोन वाहने असणे शक्यच नाही. मात्र चंद्रपूर जिल्ह्यातील सास्ती वेकोलि एरियाच्या स्टोअर्सच्या सेवेत एकाच क्रमांकाच्या दोन टाटा सुमो असल्याचा धक्कादायक प्रकार

प्रकरण दाबण्याचा प्रयत्न : वेकोलितील साहित्याच्या तस्करीसाठी होत असण्याची शक्यताचंद्रपूर : एका जिल्ह्यात एकाच क्रमांकाची दोन वाहने असणे शक्यच नाही. मात्र चंद्रपूर जिल्ह्यातील सास्ती वेकोलि एरियाच्या स्टोअर्सच्या सेवेत एकाच क्रमांकाच्या दोन टाटा सुमो असल्याचा धक्कादायक प्रकार ‘लोकमत’च्या निदर्शनास आला आहे. गेल्या दोन दिवसांपूर्वीच हा प्रकार उघडकीस आला असला तरी हे प्रकरण दाबण्यासाठी वेकोलिच्या व्यवस्थापनाकडून जोरदार प्रयत्न सुरू आहेत. या विषयावर अवाक्षरही बोलायला कुणी तयार नसल्याने परिवहन विभाग आणि पोलीस विभागानेच यात पुढाकार घेण्याची गरज आहे.राजुरा तालुक्यातील सास्ती वेकोलि एरियामध्ये काही वाहने भाडेतत्वावर घेण्यात आली आहेत. अशा वाहनांचा क्रमांक त्याच प्रकारच्या वाहनासाठी वापरून गैरप्रकार करण्याचा आणि वेकोलिच्या कोट्यवधी रूपयांच्या साहित्यांची तस्करी अशा वाहनांमधून करण्यासाठी योजलेली ही युक्ती असावी, असा अंदाज प्रथमदर्शनी व्यक्त होत आहे.दोन दिवसांपूर्वी सास्ती वेकोलि एरिया स्टोअर्स परिसरात एमएच ३४, एम-९७७८ या क्रमांकाच्या दोन टाटा सुमो अगदी जवळजवळ उभ्या असल्याचे आढळून आले. या दोन्ही वाहनांचा रंग पांढरा होता. एवढेच नाही तर या दोन्ही वाहनात कमालिचे साम्य होते. आॅल इंडिया परमिट क्रमांक असलेल्या या दोन्ही वाहनांच्या नंबर प्लेट पिवळ्या रंगाच्या होत्या. महत्वाचे म्हणजे दोन्ही वाहनांच्या नंबर प्लेटवरील अक्षरेही अगदी सारखी होती. आणखी महत्वाचे म्हणजे, एका टाटा सुमोमध्ये सर्वसाधारण वाहनात असतात तशा चालकाच्या मागे प्रवाशी शिटा होत्या तर, दुसऱ्या वाहनात मात्र या शिटाच नव्हत्या. ही जागा पूर्णत: रिकामी होती. एकाच क्रमांकाची दोन्ही वाहने बघून तेथील सुरक्षा रक्षकही क्षणभर चक्रावला. त्याने या दोन्ही सुमो अडविल्या. या संदर्भात वरीष्ठांकडे तक्रारही केली. मात्र पुढे काय झाले, याचा पत्ता कुणालाच नाही.हे प्रकरण लोकमतच्या हाती येताच याचा छडा लावण्यासाठी ‘लोकमत’ चमू आज शनिवारी दिवसभर या परिसरात होती. मात्र दोन दिवसांपूर्वीच्या घटनाक्रमाबद्दल कुणीही वाच्यता केली नाही. असा प्रकार घडलाच नाही, असे सांगून सर्वांनीच कानावर हात ठेवण्याचा प्रयत्न केला. विशेष म्हणजे, संबंधित क्रमांकाची एक टाटा सुमो आज दुपारी एरिया स्टोअर्ससमोर काही काळ उभी होती. मात्र या सुमोतील सर्व शिटा व्यवस्थीत होत्या. या सुमोसंदर्भात लोकमत चमूने अधिक माहिती घेण्याचा प्रयत्न केला असता, ते वेकोलिचेच वाहन असल्याचे सांगण्यात आले. वेकोलिने ते कुणाकडून भाडे तत्वावर घेतले, या बद्दल मात्र कुणीही जबाबदार व्यक्ती माहिती देऊ शकली नाही.(लोकमत न्यूज नेटवर्क)