लक्ष्मीनगर येथील रहिवासी प्रभावती गणेश जठ्ठार शिक्षणाधिकारी पदावर कार्यरत होत्या. त्यांचे पती आणि मुलाचा खूप आधी मृत्यू झाला आहे. त्यांचा मुलगा आयएएस अधिकारी होता, असे सांगण्यात येते. प्रभावती यांचे भाऊ सेवानिवृत्त आयएएस तथा वहिनी देशातील पहिली आयव्हीएफ सर्जन होत्या. दिवंगत ज्येष्ठ पत्रकार वामनराव तेलंग त्यांचे चुलतभाऊ होते. मुलाच्या मृत्यूनंतर प्रभावती यांची सुन आपला मुलगा आणि परिवारासोबत पुण्यात राहत होत्या. प्रभावती लक्ष्मीनगरात एकट्याच राहत होत्या. त्यांची देखभाल करणाऱ्या कामवालीने एका महिलेला त्यांच्या घरात आश्रय दिला होता. महिलेकडे संशयास्पद लोकांचे येणे-जाणे होते. प्रभावती यांच्या अवस्थेचा गैरफायदा घेऊन कामवालीने त्यांच्या बँक खात्यातून पैसे उडविणे सुरू केले होते. योग्य देखभाल न झाल्यामुळे काही दिवसापासून प्रभावती यांची प्रकृती खालावली होती. त्यांच्या घराची किंमत तीन कोटी रुपयापेक्षा अधिक आहे. कामवालीच्या मैत्रिणीने घरावर ताबा करण्याची शक्यता असल्यामुळे प्रभावती यांनी तिला बाहेरचा रस्ता दाखविला. त्यांची अवस्था पाहून वामनराव तेलंग यांच्या पत्नी श्रद्धा तेलंग यांनी त्यांच्या सुनेला नागपुरात बोलावले. बजाजनगर पोलिसांनाही त्याची सूचना दिली. बजाजनगर ठाण्यातील हवालदार विकास मेंढे एकाकी जीवन व्यतित करणाऱ्या ज्येष्ठ नागरिकांची मदत करतात. मेंढे तात्काळ तेथे पोहोचले. त्यानंतर वसंतनगर परिसरातील वृद्धाश्रमात त्यांना भरती केले. वृद्धाश्रमाच्या जवळच श्रद्धा तेलंग कुटुंबासह राहतात. त्यामुळे प्रभावती स्वखुशीने वृद्धाश्रमात जाण्यासाठी तयार झाल्या. त्यांनी आपल्या मदतीसाठी हवालदार विकास मेंढे आणि बजाजनगर पोलिसांचे आभार मानले.
.............
कोरोनाच्या काळात केली मदत
प्रभावती यांना त्यांची सुन पुण्याला घेऊन जाऊ इच्छित होती. परंतु त्यांनी नकार दिला. बजाजनगर ठाण्याच्या परिसरात अनेक ज्येष्ठ नागरिक राहतात. ते एकाकी जीवन व्यतित करतात. कोरोनाच्या काळात लॉकडाऊनमध्ये त्यांना रेशन आणि औषधी मिळत नव्हती. यावेळी मेंढे यांनी अनेक नागरिकांना मदत पोहोचविली.
.............