एकाच दिवशी ३०,६९४ लाभार्थींना लस : लसीकरणासाठी केंद्रावर रांगा : गर्दीमुळे अनेक डोस न घेता अनेक परतले
नागपूर : शहरातील १४३ केंद्रांवर शनिवारी लसीकरण करण्यात आले. चार दिवसांनंतर डोस उपलब्ध झाल्याने केंद्रावर लसीकरणासाठी नागरिकांनी मोठी गर्दी केली होती. एकाच दिवशी नागपूर शहरात ३०,६९४ लाभार्थींना लस देण्याचा नवा विक्रम करण्यात आला. शासकीय रुग्णालयात २७,६०४ लाभार्थींना तर खासगी रुग्णालयात ३,०८६ लाभार्थींना लस देण्यात आली.
लसीकरणाचा नवा विक्रम झाला असतानाच काही केंद्रांवर २५० ते ३०० नागरिक लसीकरणासाठी रांगेत उभे होते. त्या प्रमाणात डोस उपलब्ध नसल्याने डोस न घेता अनेकांना परत जावे लागले. लसीकरण न झालेल्या नागरिकांना मनस्ताप सहन करावा लागत आहे. सकाळी ११ ते दुपारी ४ पर्यंत ऑनलाइन व ऑफलाइन नोंदणीद्वारे हे लसीकरण करण्यात आले. याशिवाय तीन केंद्रांवर कोव्हॅक्सिनची लस देण्यात आली.
...
आज पुन्हा लसीकरण बंद
शनिवारी सायंकाळपर्यंत शासनाकडून नवीन डोस उपलब्ध न झाल्याने रविवारी पुन्हा लसीकरण बंद राहणार आहे. नागपुरात १८ पेक्षा अधिक वयोगटाचे लसीकरण २३ जूनपासून सुरू झाले. मात्र, या ११ दिवसांत ६ दिवस लसीकरण बंदच होते. शहरात २५ जून, २७ जून, २९ जून, ३० जून आणि १ व २ जुलै लसीकरण बंद होते. पुन्हा ४ जुलैला बंद राहणार आहे.
...
मनपा मुख्यालयापुढे आंदोलन
मनपाकडून १४३ केंद्रांवर लसीकरण करण्यात येणार असल्याचे सांगण्यात आले. मात्र, प्रत्यक्षात काही केंद्रांवर लसीकरण सुविधाच नव्हती, तर काही केंद्रांवर दुपारी १२.३० पर्यंत लसीकरणाला सुरुवात झाली नव्हती. अनेक केंद्रांवर सुमारे २५० ते ३०० लोकांची गर्दी जमली होती. मनपाच्या या नियोजनशून्य कारभाराविरोधात नागपूर एसओएस (सेव्ह अवर सोल्स)च्या स्वयंसेवकांनी शनिवारी मनपा मुख्यालयाच्या प्रवेशद्वारावर बंटी शेळके आणि तौसिफ खान यांच्या मार्गदर्शनात आणि सागर चव्हाण यांच्या नेतृत्वात आंदोलन करण्यात आले.
....
अनेक केंद्रावर १२.३० डोस उपलब्ध नव्हते.
केटीनगर यूपीएचसी येथे लसीकरणासाठी नागरिक सकाळी ६.३० पासून रांगेत असताना येथे दुपारी १२.३० पर्यंत एकाही नागरिकाला लस देण्यात आली नव्हती. तर, जगदीश नगर समाज भवन सभागृह येथेही अशीच परिस्थिती होती. शहरातील विविध केंद्रांवर एसओएसच्या तरुणांनी भेट दिली असता असाच प्रकार निदर्शनास आला. मनपाने वेळीच दखल घ्यावी अन्यथा उग्र आंदोलन करण्यात येणार असल्याचे एसओएसचे बंटी शेळके यांनी सांगितले.
....