- व्यवसायावर परिणाम : व्यापारी व नागरिक त्रस्त, वाहतुकीची कोंडी
नागपूर : गांधीबाग कापड बाजारातून ये-जा करणे सध्या कठीण झाले असून, सिमेंटीकरणासाठी रस्त्यांचे खोदकाम करून सोडून देण्यात आले आहे. अशा स्थितीत ओबडधोबड रस्त्यांवर वाहतुकीला त्रास होत आहे. त्यामुळे व्यापारी आणि नागरिक त्रस्त आहेत. वाहतुकीची कोंडी ही नेहमीची डोकेदुखी ठरली आहे.
गांजाखेत चौकापासून गांधीबाग उद्यान आणि नंगा पुतळा चौकाकडे जाणारे रस्ते सिमेंटचे बनविण्यासाठी खोदण्यात आले आहेत. बाजारातील संपूर्ण रस्ते खोदल्याने समस्या आणखी वाढली आहे. रस्त्याच्या एकाच बाजूने खोदकाम करून सिमेंटीकरण केले असते तर समस्या वाढली नसती, असे व्यापाऱ्यांचे मत आहे; पण कंत्राटदाराने मनमानी पद्धतीने सर्वच रस्ते खोदून सोडून दिले असून, कंत्राटदाराने डांबरीकरण वा सिमेंटीकरणाचे काम सुरू केले नाही. त्यामुळे बाजारात ये-जा करणाऱ्यांना त्रास होत असून, व्यवसायावर परिणाम झाला आहे.
सायंकाळी या भागात वाहतुकीची होणारी कोंडी, ही नेहमीचीच बाब झाली आहे. याशिवाय मालाच्या वाहतुकीसाठी ट्रकचालकांना अडचणी येत आहेत.
मनमानी पद्धतीने खोदले रस्ते
नागपूर ट्रकर्स युनिटी असोसिएशनचे अध्यक्ष व व्यावसायिक कुक्कू मारवाह म्हणाले, कंत्राटदाराने एका बाजूचा रस्ता खोदून काम पूर्ण करायला हवे होते; पण कंत्राटदाराने एकाचवेळी सर्व रस्ते खोदले आहेत. गांजाखेत चौकातील वळण मार्गावर सर्वाधिक खड्डे झाले आहेत. या ठिकाणी अपघाताची नेहमीच शक्यता असते. गांधीबाग रस्त्यालगतच्या दुकानदारांना पार्किंगसाठी जागा मिळत नाही. त्यामुळे दुकानात ग्राहक येत नाहीत. दुसरीकडे वाहतूकदारांनाही मोठा फटका बसला आहे.
२.८७ कोटींच्या निधीतून होत आहे सिमेंटीकरण
प्राप्त माहितीनुसार, गांधीबाग कापड बाजारातील रस्ते अनेक वर्षांपासून खराब आहेत. त्यामुळे वाहतूक आणि व्यापाऱ्यांना त्रास होतो. आ. विकास कुंभारे यांनी तत्कालीन राज्य शासनाकडून येथील रस्त्याच्या सिमेंटीकरणासाठी २.८७ कोटी रुपये मंजूर केले; पण कंत्राटदाराची कार्यप्रणाली मोठी समस्या बनली आहे. कुंभारे म्हणाले, गांधीबाग बाजारातील रस्त्यांचे सिमेंटीकरण करण्यात येत आहे. हा भाग बाजाराचा असल्याने काम वेळेत पूर्ण करण्यास अडचणी येत आहेत. कोरोना महामारीमुळे काम बंद होते. आता काम वेगात सुरू आहे. ते लवकरच पूर्ण करण्यात येणार आहे.