डॉ. आंबेडकर पुतळा लोकार्पणाचा मार्ग मोकळा

जिल्हा परिषदेच्या नवीन प्रशासकीय इमारतीसमोर डॉ. बाबासाहेब आंबेडकरांचा पुतळा बसविण्याचा निर्णय जिल्हा परिषदेने घेतला.

जिल्हा परिषद : आता मुख्यमंत्र्यांच्या वेळेसाठी पत्रव्यवहार नागपूर : जिल्हा परिषदेच्या नवीन प्रशासकीय इमारतीसमोर डॉ. बाबासाहेब आंबेडकरांचा पुतळा बसविण्याचा निर्णय जिल्हा परिषदेने घेतला. अनेक वर्षानंतर पुतळा बसवण्यातही आला. परंतु पुतळा बसवण्यासाठी राज्य शासनाकडून मंजुरी मिळाली नसल्यामुळे पुतळ्याचे लोकार्पण रखडले होते. अखेर १९ नोव्हेंबरला डॉ. बाबासाहेब आंबेडकरांचा पूर्णाकृती पुतळा बसविण्यास सामान्य प्रशासन विभागाने मंजुरी प्रदान केली असून परवानगी पत्र जारी केले आहे. आता लोकार्पणासाठी मुख्यमंत्री देवेंद्र फडणवीस यांची तारीख मिळावी यासाठी पत्रव्यवहार सुरू झाला आहे. तत्कालीन जिल्हा परिषद अध्यक्ष रमेश मानकर यांच्या कार्यकाळात जिल्हा परिषदेच्या प्रशासकीय इमारतीसमोर डॉ. बाबासाहेब आंबेडकरांचा पुतळा बसविण्याचा निर्णय घेण्यात आला होता. त्याची प्रत्यक्ष अंमलबजावणी १२ वर्षांनी झाली. पुतळा बसविण्यासाठी राज्य शासनाकडून परवानगी घेणे आवश्यक होते. जि. प. प्रशासनाने वारंवार पत्रव्यवहार करूनही परवानगी मिळाली नव्हती. सध्याचे समाजकल्याण सभापती दीपक गेडाम यांनी पूर्णाकृती पुतळा तयार करण्यासाठी मूर्तिकाराकडे रेटा लावला. समाजकल्याण समितीच्या सर्व सदस्यांनी पुतळ्याची पाहणी केली. त्यानंतर गेल्या महिन्यात प्रशासकीय इमारतीसमोर पुतळा बसविण्यात आला. याशिवाय पुतळ्याचा चबुतरा तयार करून त्या ठिकाणी सौंदर्यीकरणही करण्यात आले होते. परंतु शासनाची परवानगी नसल्यामुळे पूर्णाकृती पुतळ्याचे लोकार्पण अडकले होते. पालकमंत्री चंद्रशेखर बावनकुळे यांनी पुढाकार घेतला. स्वत: शासनाकडे पत्रव्यवहार केला. त्यामुळे सामान्य प्रशासन विभागाने १९ नोव्हेंबरला जिल्हा परिषदेच्या इमारतीसमोर डॉ. आंबेडकरांचा पूर्णाकृती पुतळा बसविण्यास परवानगी दिली. यासंदर्भातील सामान्य प्रशासन विभागाने जिल्हाधिकाऱ्यांना पत्र पाठविले आहे. या पुतळ्याचा लोकार्पण सोहळा मुख्यमंत्र्यांच्या हस्ते व्हावा, अशी पदाधिकाऱ्यांची इच्छा आहे. त्यासाठी मुख्यमंत्री कार्यालयाकडून तारीख मागण्याबाबत प्रशासनाने पत्रव्यवहार सुरूकेला आहे.