नागपुरात विद्यार्थ्यांना व्हॉट्सॲपवर आल्या प्रश्नपत्रिका! बारावीचे भौतिकशास्र, रसायनशास्त्राचे पेपर फुटले

Nagpur Paper Leak: नागपूरमध्ये बारावीचे दोन पेपर फुटल्याचा प्रकार समोर आला आहे. भौतिकशास्त्र आणि रसायनशास्त्र या दोन विषयाच्या प्रश्नपत्रिका विद्यार्थ्यांना थेट व्हॉट्सॲपवर पाठवल्या गेल्या.

नागपूर : नागपुरात बारावीचा रसायनशास्त्र व भौतिकशास्त्र विषयाचा पेपर फुटल्याचा धक्कादायक प्रकार उघडकीस आला आहे. अज्ञात व्यक्तीने प्रश्नपत्रिका विद्यार्थ्यांच्या व्हॉट्सॲपवर पाठविल्या. एका परीक्षा केंद्रावर पर्यवेक्षकाच्या सतर्कतेमुळे हा प्रकार उघडकीस आला. दोन विद्यार्थिनींची या प्रकरणात चौकशी करण्यात आली आहे.

शिक्षणाधिकारी (माध्यमिक) अनिल दहीफळे यांच्या तक्रारीवरून पोलिसांनी पेपर फोडणाऱ्यावर गुन्हा दाखल केला आहे. हा पेपर किती जणांपर्यंत पोहोचला; तसेच या रॅकेटमध्ये किती जण सहभागी आहेत, याची माहिती पोलिस घेत आहेत.

विद्यार्थिनीच्या झडतीत उघड झाला प्रकार

सिव्हिल लाइन्स परिसरातील सेंट उर्सुला हायस्कूलमधील परीक्षा केंद्रावर बुधवारी पेपर सुरू असताना एक विद्यार्थिनी बारा वाजण्याच्या सुमारास प्रसाधनगृहात गेली. १५ मिनिटे ती वर्गात न आल्याने पर्यवेक्षकांना संशय आला.

तिची झडती घेतली असता स्मार्ट फोन आढळला. तो तपासला असता एका व्हॉटस्अॅप ग्रुपवर परीक्षेआधीच पेपर आलेला होता. त्याच ग्रुपवर उत्तरेसुद्धा आलेली होती. संबंधित विद्यार्थिनीने मैत्रिणीचेही नाव सांगितले. दोघीही त्या एकाच व्हॉटस्अॅप ग्रुपवर असल्याचे स्पष्ट झाले. १६ फेब्रुवारी रोजी झालेला भौतिकशास्त्राचाही पेपर त्यात आढळला.

शिक्षण मंत्रालयाकडून दखल

शालेय शिक्षण राज्यमंत्री पंकज भोयर यांनी या प्रकरणी जबाबदार असलेल्यांवर कठोर कारवाई करण्याचे आदेश दिले आहेत. तसेच या प्रकरणाचा सविस्तर अहवाल देण्याचेही आदेश दिले आहेत. खासगी कोचिंग क्लास असो, खासगी व्यक्ती असो किंवा विभागाशी संबंधित कोणीही असो; जर या प्रकरणात कोणी सहभागी आढळले तर त्यांच्यावर कठोर कारवाई केली जाईल, असे भोयर यांनी स्पष्ट केले.

संबंधित पेपरफुटीमुळे विभागीय शिक्षण मंडळाच्या कारभारावरही प्रश्नचिन्ह उपस्थित झाले आहेत. पेपरफुटीत कोणत्या परीक्षा केंद्राचा किंवा विभागीय कर्मचाऱ्याचा सहभाग होता का, याची चौकशी सुरू आहे.  

66 संशयित विद्यार्थिनीच्या मोबाइलमधील व्हॉट्सअॅप ग्रुपवर रसायनशास्त्र व भौतिकशास्त्र विषयाचे पेपर आढळले. याची चौकशी करून कारवाई केली जाईल. -डॉ. शिवलिंग पटवे, अध्यक्ष, विभागीय शिक्षण मंडळ